Magpunsisok na sab ang mga tawong namakasyon ug gustong mag-relax sa mga nagkalainlaing resorts karong taas-taas ang mga adlaw nga walay trabaho.
Buhi na sab kaayo ang mga resorts apil na ang mga naninda og nagkalain-laing mga pagkaon ug pabugnaw diha sa palibot aning mga resorts tungod sa pagdagsa sa mga tawo.
Ang mga LGUs apil na ang kapolisan miingon nga naghimo na sila og inspeksyon sa mga resorts aron pagsigurong luwas ang mga dumuduong.
Niadtong nakalabay nga tuig dunay nanggawas nga mga isyu bahin sa pipila ka mga resorts nga nagpalabi og paburot sa presyo sa ilang mga baligya ngadto sa mga lokal nga turista.
Alang sa kasayuran sa publiko ug sa mga nagplanong magbakasyon sa mga nagkalain-laing resorts, duha ang rate sa mga baligya didto.
Dunay presyo para sa mga lokal nga turista, lahi sab ug mas mahal gamay ang rate para sa mga langyaw. Samtang makiangayon kini para sa mga Pilipino, medyo makapanglingolingo ani og gamay ang mga langyaw nga turista.
Dili na unta masubli ang nahitabo didto sa usa ka resort sa Bohol nga diin dunay mireklamo nga lokal nga turista sa kadako sa gipabayran kanila nga pagkaon.
Nag-viral kini sa social media ug miani og daghang pagsaway, gani daghan sab sa mga netizens ang nanggawas ug nipadayag sa ilang susamnang kasinatian sa maong resort ug ingon man sa uban pung mga resorts nga ilang naadtoan.
Ang resulta, napugos ang local nga kagamhanan sa maong lugar sa pagpahunong sa operasyon sa maong mga vendors. Mahulog nga sila ray nagpatay sa ilang kaugalingong panginabuhian.
Hinuon nabalik na sila sa pagpaninda apan duna nay regulasyon bahin sa presyo sa ilang mga paninda nga dili makapakurat sa mga turista.
Mao sab unta kini ang himuon sa ubang mga LGUs nga dunay mga nag-operate nga resorts ubos sa ilang hurisdiksyon.
Pasidan-an daan ang mga resort operators ug mga vendors nga dili magpalabi og pasobra sa ilang presyo.