Ang armory mao ang dapit diin ibutang o tagoon ang mga armas. Linya kini sa mga armas nga anaa nga gamiton sa usa ka katuyoan.
Armory matud pa sa Merriam-Webstar nga diksyonaryo suplay kini sa armas alang sa depensa ug ataki; gikolekta sa anaa nga resources; dapit diin ibutang ang armas ug kagamitan sa militar.
Sa sunod-sunod nga pagronda sa mga balay, yuta ug edipisyo nga gipanag-iya sa mga Teves sa Negros Oriental, mibantang ug gisakmit sa mga sakop sa Criminal Investigation and Detection Group (CIDG) ang nagkalain-laing matang sa armas ug mga bala nga walay lisensiya.
Ang mga armas ug mga bala nakuha sa mga propriyedad nga gipanag-iya ni Kongresista Arnulfo “Arnie” Teves Jr. ug kanhi gobernador sa Negros Oriental nga si Pryde Henry Teves.
Ang ronda gihimo sa CIDG ug ubang unit sa kapolisan ug militar subay sa ilang pagpatuman sa kampanya sa gobiyerno ni Presidente Ferdinand “Bongbong” Marcos Jr. nga hiposon ang mga armas nga mga ihalas o ihas.
Giklaro sa kapolisan nga ang ilang gihimo wala kini kalambigitan sa pagpatay sa gobernador sa Negros Oriental nga si Roel Degamo niadtong Marso 4 ning tuiga. Ang gipatay nga gobernador kontra sa politika sa mga Teves.
Ang magbaton og armas o mga armas kadto lamang mga tawo nga mahiligon sa armas ug mga tawo nga adunay hulga sa ilang kinabuhi.
Ang mga tawo nga makabaton og hulga sa ilang kinabuhi nakabasi kini sa naglainlaing rason. Ang kanhi gobernador na si Henry Teves ug kasamtangang kongresista sa ikatulo nga distrito sa Negros Oriental nga si Arnie Teves Jr. Nakabaton ba og hulga sa ilang kinabhi?
Kun wala man silay hulga sa ilang kinabuhi ug ang rason sa ilang pagbaton og armas mao lamang ang ilang pagkamahiligon niini nganong wala man nila kini lukati og lisensiya? Tungod ba kay adunay limitasyon kon unsa nga matang sa armas ug pila lang ka armas ang poyde nga malisinsiyahan?
Unsa man tuod ang tumong sa duha ka Teves nga naghimo man sila og armory? Ang duha lang ka Teves ang makatubag niini.