Ambot di ba lang kamao. O may dautang plano sa agrikultura. Tsamba ba lang nga niinsistir si Presidente Ferdinand Marcos Jr. paglingkod isip Agriculture secretary ug sunudsunod nga niulbong mga kontrobersiya sa pagnihit sa suplay, pagsulbong sa presyo ug pagsiaw sa smuggling sa sibuyas, asukar ug ubang produkto sa agrikultura?
Gidemalas ba lang o tinuyo nga ang tanang lakang sa administrasyon imbes mosulbad nipasamot hinuon sa problema? Wa ba lay ikatubag o nagpapating sa pagpakahilom sa mga eskandalo?
* * *
Kon karon pang kakita sa pattern sa impunity human napatay si Gobernador Roel Degamo sa Negros Oriental, hagbay rang gisalida sa Malakanyang ang pattern sa incompetence:
• Nisamot ang kanihit ug kamahal sa asukar sa niaging tuig tungod sa nukus-nukos sa presidente–nisugyot og importasyon sa 600,000 metric tons sa asukar, nakumbinser nga katunga lay komprahon, pero dihang napirmahang sugar order gipa-resign ang namirma ug niinsistir nga abundang suplay pero gitagoan;
• Dihang ang girondang mga bodega nakamatuod nga lehitimong ilang importasyon, nikompra og 150,000 metric tons pero uwahi na.
* * *
Ang kamakauuwaw sa bulilyaso nalabwan lang sa pag-apura sa tulo nila ka paboritong kompaniya pag-import og 440,000 metric tons nga asukar karong tuiga bisan wa pay sugar order nga napirmahan ni napublikar. Ug sama sa ilang gihimo sa niaging tuig nipasalipod ang Malakanyang sa pattern sa papating:
• Pito ka buwan na human sa kontrobersiya sa Sugar Order No. 4, nabalik na lang sa puwesto ang pipila ka opisyal nga nataktak, way hisgot ang presidente nganong gi-apiki ang mga konsumidor sa asukar; ug
• Kapin sa buwan human sa expose ni Senador Risa Hontiveros sa Malacañang-sponsored sugar smuggling ginamit ang Sugar Order No. 6, nagpabiling tak-om ang presidente.
* * *
Nagsalig tingaling presidente sa iyang mayoriya sa eleksiyon (kansang resulta gikuwestiyon sa IT experts sa Korte Suprema) ug sa kasipsip sa Kongreso:
• Ang Senado nibasol sa namirma sa Sugar Order No. 4 (pero ang imbestigasyon ni Executive Secretary Lucas Bersamin nakakaplag nga namirma sila tungod sa sugo sa Malakanyang) ug niisnab sa expose ni Hontiveros; ug
• Ang House of Representatives nihudlat sa gidudahang onion smugglers pero wa mopatawag sa giingong kinadak-ang smuggler kay giilang kasosyo sa bayaw sa presidente.