EDITORYAL - Nasipyat sa aksyon batok ASF?

Usa ka maayong desisyon ang gihimo ni Gob. Gwendolyn Garcia nga temporaryo una nga hunongon ang culling o pwersahan nga pagpatay sa tanang mga baboy duol sa mga baboyan nga natakboyan og African Swine Fever didto sa dakbayan sa Carcar.

Ang desisyon sa gobernador nakaibot og tunok sa dughan sa mga negosyante og baboy ilabi na sa mga maguuma nga namuhi og baboy isip panginabuhian.

Apan sa wala pa mausab sa gobernador ang kamandoan, duna na 141 ka mga baboy gikan sa Brgy. Can-asujan nga ilang gipatay ug gilubong.

Ang culling maoy labing sayon ug labing epektibong pamaagi nga gigamit sa abroad aron mas madali ang pagpakgang sa pagkatap sa mga contagious diseases sa mga hayop sama sa ASF , foot and mouth diseases, avian flu virus, cholera ug uban pa sa mga dagkong kompanya didto sa Uropa.

Ang tumong niini nga dili na matakboyan pa ang ubang mga baboy o uban pang livestock sa usa ka lugar gikan sa maong sakit.

Apan gikinahanglan man gud niini nga siguraduhon kun asa gyud gikan nga partikular nga farm o piggery ang infected nga hayop, ug ning kasoha baboy aron kadto maoy siguraduhong dili makapagawas og baboy padung sa merkado. Uwahi ng nahibaw-an ni Garcia nga ang na-detect nga ASF sa blood sample gikan  kini sa baboy  nga giihaw sa ihawan sa Carcar, apan walay nakasigurado gyud kun diin gikan kining maong baboy.

Siguradong dunay nakahibalo sa maong baboy kun diin kini gikan tungod kay dili man ang baboy ray nangunay pagadto sa ihawan aron magpaihaw.

Duna gyuy tawo o komprador og baboy nga maoy nagdala niini didto, apan pagkasayod sa resulta nga positibo kini sa ASF, wala na kini mopatim-aw pa sa maong ihawan sa kahadlok nga mapagan ang uban pa unya nilang mga nakompra nga baboy.

Maayo nalang nga bayran sa lalawigan ang matag baboy nga napatay na, may ASF man o wala.

Daghang naguol nga pamatyon dayon ang mga baboy diha sa maong siyudad bisan walay nakasiguro kun diin gyud gikan kadtong baboy nga positibo sa ASF.