EDITORYAL – Double-dead pork

Gipahugtan na karon sa mga otoridad ang pagbantay sa mga utlanan sa Dakbayan sa Carcar aron masigurong walay mga binuhing baboy, karne niini, baktin ug uban pang produkto nga gigamitan og baboy nga makagawas sa maong siyudad.

Makasiguro pa ba kaha ang mga konsumidor kun ang karneng gibaligya o processed pork meat dili double dead? Makapasalig ba ang tanang otoridad sa kamerkadohan dinhi sa Sugbu nga dili sila malutsan?

Ang paghigpit sa utlanan sa Carcar pinasubay kini sa executive order nga giluwatan ni Gobernador Gwendolyn Garcia human nga dunay na-detect nga African Swine Fever sa blood-sample sa baboy nga padung ihawon sa ihawan sa maong siyudad.

Ang pagkadiskubre niini nakapaalarma sa buhatan sa gobernador kinsa sa nanglabay nga mga buwan nakapagawas sab og E.O. nga naghigpit sa pagpasulod og mga baboy gikan sa mga probinsiyang dunay presensya sa ASF.

Gihimo kini sa gobernador aron protektahan ang P11 bilyones nga industriya sa baboyan dinhi sa Sugbu. Dili gusto sa gobernador nga matakboyan ang mga baboyan dinhi hasta na kining mga gagmay’ng mga mag-uumang namuhi’g baboy.

Apan nabantayan nga bisan pa sa maayong tumong sa gobernador, daghan gihapon kaayong mga negosyante ang wala makakita sa tinguha sa opisyal.

Dunay insidente didto sa Northern Cebu sayo ning tuiga diin dunay mga gipalusot nga mga baboy nga gikarga lang og pumpboat gikan sa Western Visayas nga dunay mga kaso sa ASF.

Maayo nalang kay nasakpan, apan kinsa may nakasiguro nga una pa kadtong hitaboa nga dunay nagpalusot og baboy dinhi. Di ba kaha kadaghan na kining buhata sa mga hakog nga negosyante nga wala lang dayon masakpi?

Na-detect  ang sa Carcar pinaagi sa blood samples sa padung ihawon nga baboy. Kanang mga pangmatadahon sa mga hilit nga lugar, nakuhaan ug na check ba na ang blood samples?

 Kumusta kaha ang ubang mga baboyan sa nagkalain-laing mga lungsod? Wala ba kahay mga nahitabong kalit lang nangamatay ang mga binuhing baboy sa mga gagmay’ng baboyan sa kabukiran?

Wa ba kaha ang uban ani nga nangamatay na gipamaligya gihapon ngadto sa mga manghimoay og chorizo, tocino, skinless ug uban pang processed pork meat? Bahala’g sa barato basta makabawi-bawi gamay sa alkanse ang nagbuhi niini?