EDITORYAL - Cha-cha, Con-con, makabusog ni?

Daghan kaayong mga kalisdanan ug pagsuway ang mga Pilipino karon gikan sa pagsaka sa mga presyo sa batakang panginahanglan, naay pay kakuwangon sa trabaho, seguridad sa nasud tungod aning tension sa Taiwan Strait ug sa West Philippine.

Apan makapahibulong kun nganong dunay mga magbabalaod nga wala may laing nakitang maayong buhaton kondili ang pagkubi-kubi sa kasamtangang Batakang Balaod o Konstitusyon sa Pilipinas nga gitamdan karon.

Una sa tanan, nganong kinahanglan pang usbon ang kasamtangang Konstitusyon? Duna bay problema bahin niini? O duna lay gustong usbon kini aron mopahaom sa ilang tagsa-tagsa ka mga interes?

Usa pa, gikatahong moabot og P15 bilyones ang gikinahanglang pundo aron buhaton kini sama sa maoy giluto karon diha sa Ubos Balay Balauranan.

Ang House of the Representatives panel miaprubar dili palang dugay og mga pamaagi aron masugdan ang pag-usab sa Konstitusyon pinaagi sa constitutional convention o con-con.

Sa Senado sab, dunay kanhi artista nga karon senador na ang namugos sab sa iyang gusto nga amendahan ang kasamtangang Konstitusyon ilab I na ang mga matud pa economic provisions niini, dili man unta siya ekonomista apan maoy may gustong hilabtan sa Konstitusyon.

Samtang dunay punto ang maong senador bahin sa probisyon mahitungod sa mga langyaw nga pwedeng makanegosyo dinhi sa nasud nga walay hasol, apan kinahanglan pa ba gyud nga usbon ang batakang balaod?

Pwerteng daghanang giatubang sa problema sa katawhang Pilipino karon nga kinahanglang maoy unahon ug dili kanang pang-usbon ang kasamtangang gitamdang Batakang Balaod.  Nihit kaayo ang kwarta sa gobiyerno , makat-on usab sila og gamit niini sa hustong tumong.

Kanang P15 bilyones nga pundong gikinahanglanon aron ibayad sa mga eksperto sa balaod ug konstitusyon ug sa ubang gastos paghimo aning Con-con,makapakaon na kini og pila ka milyon ka baba na sa gutom nga Pilipino; pila na ka public hospitals ang mabutangan og dialysis centers; pila ka irigasyon na ang matukod sa mga umahan, pila na ka public school buildings ang mahimo ug daghan  pang uban.

Maayo tingaling pangutan-on kaning mga magbabalaod ug mga senador kun nananghid ba sila sa katawhang Pilipino aning ilang planong pag-usab sa Konstitusyon?  Kun nananghid sila, pila man kaha ang misugot ug pila ang supak?