Katekesis no. 105

Tawag sa Pagbag-o Binasi: Jonas 3;1-10

Sa dihang gisugo si Jonas sa Dios sa pagmantala ning makalilisang pahimangnon: “Laglagon ang Ninibe Sulod sa Kap-atan ka mga Adlaw!” butang nga nakapahimo sa hari ug sa iyang mga sakop sa pagtuo ug nihimo dayon og mga lakang aron magbag-o ug maghinulsol. Tuod man nagbisti sila og sako, nagbolibod og abo sa ilang ulo, nagpuasa ug nangayo og pasaylo. Ilang gipakita ang ilang pagbasol ug paghinulsol. Kining maong akto ang nakapausab sa hunahuna sa Dios. Imbis iya silang laglagon nibuot siya nga dili na lang. Nakita man sa Dios ang ilang pagkamatinud-anon.

Ang kabag-ohan mahitabo lamang kun:

1.  Anaa ang paningkamot ug determinasyon nga biyaan ang naandang pagkinabuhi sa sala.

2.  Ang grasya nga padayong gipangayo matag adlaw dako kaayo og tabang aron mamahimong maangkon ang kabag-ohan.

3.  Dili nato makab-ot ang kabag-ohan kun dili nato bag-ohon ang atong kaugalingon.

4. Ug kun buot kita nga mabag-o ang kalibotan angayan lamang nga magbag-o kita ingon nga personal nga tampo alang sa mas maayo nga kalibutan.

5.  Ang tawag sa kabag-ohan alang man kanatong tanan.

Ning atong panaw sa Panahon sa Kwaresma, sa makadaghan kita nahitumpawak sa sayop nga baruganan ug kinaugalingon nga panginahanglan. Unta makita nato nga ang kaluwasan dili lang gyud unta personal nga paningkamot kondili katilingbanon usab. Magtinabangay kita alang sa atong kaluwasan.