Nunot sa pagsaulog sa Shark Conservation Week, miawhag ang kahugpongan sa mga marine conservationists nga mapalabang ang balaod nga magpanalipod ug mag-atiman sa mga pating (sharks) ug mga pagé (rays). Ang naghinobra ug ang ilegal nga pagpanagat maoy dakong suliran nga angay atimanon. Tataw ang posisyon sa mga marine advocates: ang pagpanalipod sa mga pating. Apan alang sa akong amigo, adunay duha ka specie sa pating nga angay puohon: ang ‘PATING’ sa Kongreso ug ang “pating-tigpatanto” (loan sharks). Sila kadto’ng matang sa pating nga dili angay protektahan, hinonoa angay nga dakpon ug “larangon.” Pagkatoytoy!
Dili katumbas sa kantidad
Matud pa sa Presidente, panahon na nga hatagan og prayoridad ang maritime sector tungod sa dakong tampo niini paglambo sa ekonomiya, nunot usab sa kamatuoran nga ang Pilipinas usa ka maritime nation. Gidayeg sa presidente ang mga Pilipino’ng seafarers kinsa naghatag kanato’g dungog ug garbo. Hinaut nga kining pamahayag dili lain’g dula-pulong sa Presidente sama sa iyang paghatag prayoridad sa sektor sa agrikultura. Tinuod ang panahom nga “Usahay, ang saad sa politiko dili gani katumbas sa kantidad sa papel nga gisulatan niini.” Madahaan!
Lisod sabton ang ekonomiya
Matud pa ni NEDA Secretary Arsenio Balisacan, ang pagpa-usbaw sa suholan pinaagi sa pagpalabang og balaod alang niini, makadaut hinuon sa ekonomiya sa kapulihay. Sugyot sa NEDA, ang labing maayo mao ang pagpa-usbaw sa suholan pinaagi sa pagpalapad sa mga ekonomikanhong kalihokan nga mopasaka sa demand sa pamuo. Lisod sabton ang ekonomiya kay bisan gani ang pagpa-usbaw sa suholan makadaot man diay. Matud pa bitaw, “ang pagtuon sa ekonomiya sama ra nga nagkat-on ka pag-ayo sa guba nga sakyanan samtang padayon nga nag-andar ang makina niini.” Fezteleern!
Suliran sa transportasyon
Giawhag sa Senado ang LTFRB nga i-oktaba lang una ang laraw niini nga pag-phaseout sa mga traditional jeepneys nga gitakda karong Hunyo 30, 2023 aron malikayan ang gilaraw nga usa ka semana nga transport strike sa mga transport groups. Nagkadaiya ang suliran sa transportasyon apan kon ang nakita sa mga senador mao lamang ang suliran sa transport strike, maingon nato nga laskot pa gihapon ang kaugmaon sa transport sector sa nasud. Haum ang panahom nga “ang usa ka malamboon nga nasud dili kadtong ang mga kabos adunay kaugalingon’g sakyanan kon dili kadtong ang mga dato mosakay sa mga public transportation.” Muleeeng!
Adunay “ASF”
Gipanghimakak sa Department of Agriculure-Central Visayas (DA-7) nga adunay presensiya sa African Swine Fever dinhi sa Sugbo ug nga walay kamatuoran ang gikataho nga adunay nilibo ka mga baboy ang nangamatay sa usa ka barangay sa Lungsod sa Minglanilla. Padayon ang DA-7 sa hugot nga monitoring sa mga baboy dinhi sa Probinsya sa Sugbo. Maingon nato nga fake news ang giingon nga kaso sa ASF sa Minglanilla. Apan alang akong amigo, may kamatuoran gihapon ang maong balita kay sa ilang lugar daghan kuno ang ang mga foreigner nga nagtakin og mga babaye nga ginganlan usab og ASF – “Asawa Sa Foreigner.” Fishkots!