EDITORYAL - Asa naman ang National ID?

Daghan na ang nangumusta bahin sa National ID. Duna nay nakadawat sa ilang IDs ug duna say uban nga papel ra ang gihatag nga klaro kaayong mura lang og gipa Xerox copy.

Hain naman diay ang pundo ani? Nganong langan man kaayo ang pagabot sa mga IDs ug nganong ang uban Xerox copies man? Nahutdan na og PVC material para sa ID?

Ang National ID system pinaagi sa Philippine Identification System sa Philippine Statistics Authority (PSA) maoy gitahasan sa gobiyerno alang sa paghimo og mga IDs sa tanang mga Pilipino.

Ang Pilipinas adunay gibanabanang sobra 120 milyones nga populasyon, matud pa sa PhilSys, base sa talaan niadtong Enero 27, 2023 moabot na og 76.2 milyones ka Pilipino ang nakaparehistro.

Ang 29.9 milyones niini nahatagan na og ID pinaagi sa Philippine Postal Office samtang 18.4 milyones sab ang nahatagan og digital copy sa ilang ID. Wala maghisgot bahin sa Xerox copy nga ID.

Importante kaayo ang national ID matud pa sa kapolisan tungod kay pinaagi niini mas mapadali ang pag-trace sa mga tawo ilabi na kadtong dunay mga dautang rekord.

Sa pikas bahin, gamit gyud kini nga ID aron pag-ila sa tawo apan subo lang nga dili pa tanan, ilabi na ang pribadong sektor, ang miila isip balidong ID ang National ID. Ang uban miingon tungod kay walay pirma sa bearer.

Dinhi sa Pilipinas nga pwerteng daghan og kuskos balungos, anhi ra ka makakita nga ang aplikante og trabaho (bisan first time pa) pangitaan og balidong ID, kanang gikan gyud kuno sa gobiyerno, maayo na unta ning National ID apan di pa man dawaton.

Mao-mao ra sab ni sa mga kompanyang libog og gipangitang trabahante, gusto nilang nga fresh graduate apan kinahanglang dunay work experience. Unsa man intawon pagkuha og experience kun di dawaton kay wala niini?

Angay tingaling rebisahon sa PhilSys ang ilang pagproseso aron matarong kini tungod kay daghan ang nagpaabot niini.