Sagunson ang mga natalang aksidente sa kadalanan dinhi sa Sugbu nga nikalas na og mga kinabuhi ug miangol sab og mga tawo lakip na ang kadaut sa mga kabtangan. Ni bulana lang sa Pebrero 2023 pito ka mga kinabuhi ang nakalas tungod sa aksidente sa karsada.
Pipila ka adlaw na ang nakalabay, naaksidente ang usa ka awto didto sa Danao City nga niresulta sa kamatayon sa managtiayon ug usa nila ka anak, samtang usa pud nila ka anak ang grabeng naangol. Ang awto nakabangga og wing van truck.
Niadto sab Pebrero 23, nabanggan sa usa ka bigbike ang usa ka babayeng call center agent diha sa Banilad, Mandaue City. Patay ang maong babaye ug ang babayeng angkas sa bigbike samtang talandugon sa tambalanan ang drayber niini.
Gitubag sab kini dayon og laing aksidente kagahapon sa buntag, Pebrero 25 diha sa Transcentral Highway sa Brgy. Cansumoroy sa Lungsod sa Balamban. Duha ang nakalas nga nag-angkasay sa us aka motorsiklo gikan sa Cebu City padung sa Balamban.
Bisan gani walay kontra, posibleng ikamatay sa nagmaneho kun dili magmatngon. Ang motorsiklo matud pa sa kapolisan nalahos sa punoan sa Acacia kilid sa karsada nga dulhogon.
Ang Land Transportation Office-7 nipahugot na sa ilang mga checkpoints sa kadalanan aron sa pagsusi sa mga dokumento sa mga motorista. Samtang ang kapolisan wala say puas sa paghimo og susamang operasyon diha sa kadalanan.
Way laing tuyo ang LTO-7 kondili ang road safety ra gyud para sa tanan, samtang ang sa kapolisan kabahin kini sa ilang anti-criminality campaign sanglit ang ubang mga badlungon sa balaod mogamit man sab og sakyanan o motorsiklo.
Importante gyud kaayo nga ang mga isyuhan og driver’s license kato gyung makamaong mo-drive, mao nga dako kaayo og kapuslanan kining pagpaubos una og theoretical driving ug actual nga driving lesson ang mga aplikante. Diha man gud makat-onan dili lang ang kabahin sa hustong pagmaneho kondili hasta sab ang mga traffic laws ug road safety signs nga makasalbar kanila.
Apan subo lang nga duna gihapoy mga lisensiyadong bag-ong drayber ang wala mag-agi niini kay niagi og fixers. Gawas nga sila peligro sa uban, gibutang sab nila sa risgo ilang kinabuhi.