EDITORYAL - EDSA People Power Revolution

Karong adlawa ang pagtimaan sa ika-37 ka tuig nga kasumaran sa EDSA People Power Revolution nga nahitabo niadtong Pebrero 25, 1986. Mao kini ang rebolusyon nga wala moresulta sa dugoong kahumanan sa usa ka diktadorya sa tibuok kalibotan.

Nianang adlawa nanggawas sa kadalanan ang mga Pilipino, sagol-sagol, adunahan ug kabus apil na mga relihiyosong pundok gikan sa nagkalain-laing relihiyon aron mag-usa sa pagtingog nga “husto na!”

Bisan ang mga sundalo ug konstabularyo nga naanad na sa gubat ug maoy gigamit nga hinagiban sa gipasanginlang diktador nga si Ferdinand Marcos aron ang ilang gusto maoy matuman, wala makapiog sa hiniusang tingog sa katawhan.

Inay bayolenteng kalihokan, pag-ampo ug pag-awit maoy nagpatigbabaw nga ang tema para sa kausaban sa sistema sa gobiyerno sa Pilipinas.  Tuod man, malinawon nga milampos ang rebolusyon nga walay dugoong panghitabo, sukwahi sa ubang mga rebolusyon sa ubang mga nasud.

Karon, nabalik na sab ang mga Marcos sa gahum pinaagi sa anak niini, Presidente Ferdinand “Bongbong” Marcos Jr. nga nakadaog sa nakalabay nga piniliay pinaagi sa makabungog nga suporta sa mga tawo kaniya.

Samtang wala mangayo ang pangulo og pasaylo sa mga gipasangil batok sa iyang amahan ug sa ilang pamilya, misaad kini nga dad-on sa kalamboan ang nasud.

Kining iyang mga saad ginungtan karon sa katawhan nunot usab sa nasinating krisis sa ekonomiya nga naimpluwensiyahan dili lang sa lokal kondili sa mga panghitabo sab sa kalibutan.

Daghan na sa mga major players sa Martial Law ug ingon man sa EDSA Revolution ang nitaliwan na sama nilang kanhi presidente Corazon Aquino, kanhi presidente Fidel V. Ramos, ug daghan pang uban, apan naa pay pipila nga buhi pa hangtud karon.

Dunay mga pangutana bahin sa pagbalik sa gahum sa mga Marcos, kun ang pagtulon-an sa EDSA nakalimtan na ba sa tanan. Pagkatinuod, walay bisan kinsa nga makapangangkon og hustong tubag mahitungod niini.

Kun nakalimtan man o wala sa mga nabuhi na sa maong panahon, kinahanglan lang nga ipasa nila kini ngadto sa mga mosunod nga henerasyon.

Aron pagpahinumdom sa tanan nga ang gahum wala sa mga nanglingkod sa pwesto kondili naa kini sa mga kamot sa katawhan sa usa ka demokratikong nasud.