Abo sa pagpahinundom

Ania na usab kita sa adlaw nga tigpamadlis og agtang sulod sa mga Katolikong simbahan, diin ang pari moingon: “Sa abog ka gikan, sa abog ka mobalik.”

Ambot, naagian ba kaha usab ninyo ang matang sa kasinatian nga akong pagabation inig pabadlis nako sa akong agtang? Diin inig dapat sa tudlo sa pari sa akong agtang, ma-feel nako ang talagsaong kainit nga daw Iyahang mga kamot nga mihikap kanako – nagpahinumdom nga bisan ako makasasala, Iyaha gihapon akong pinangga.

Mao kini ang ipasabot sa nagkuros nga abo nga ibadlis sa atong agtang sa Ash  Wednesday. Ang kainit sa dugo nga mibuhagay sa gikoronahag tunok Niyang ulo, sa nanagdupa Niyang mga kamot ug mga nagbitayng ?il nga gilansang sa balabag hangtod namatay aron lamang pagtanyag natog kaluwasan.

Apan unsa bay gibuhat sa katawhan niining Adlaw sa Pagmadlis ug pagsaad og mga sakripisyo? Sa milyonmilyong Kristiyanos dinhi sa atong nasod, miabot bag katunga ang nanimba aron magpabadlis? Ultimong gamay'ng simbahan, dili mapuno.

Usab, dili tanang nanimba nagpabadlis. Kay hadlok dili na makakaog baboy kada Biyernes sulod sa kuwaresma. Samtang may nagpabadlis nga kusog gihapon mokaog baboy, kinsa modayon rag ingon: “Hala, uy, Biyernes man diay ron, no?” Ug kay nakakaon na man, magsige na lang!

Ang dili pagkaog baboy kada Biyernes usa lamang ka gamayng praktis sa pagsakripisyo.

Ang pag-abstain sa paghuboghubog, pagsugal, pakighilawas ug paghimog Holidays sa Holy Week, mga maanindot puasa nga ikahimuot sa Ginoo. Apan ambot, nganong maglisod man gyud paghimo ang tawo?

Usa baya kini ka espirituhanong praktis, nga makapahalangit sa tawo nga nagbag-o na sa iyang kinabuhi sama niadtong tulisan, kinsa sa ngilit sa iyang kamatayon human makaamgo sa dako niyang kasaypanan, nangilaba nga unta hinumdoman siya kon si Hesus atua na sa langit? Diin dihadha dayon giingnan: “Karon, karon dayon mahiuban ka Nako sa paraiso?”

Ug mao kini ang kahulogan sa abo nga gibadlis sa atong agtang – ang pagpahinumdom natong makasasalang gikan sa abog, nga kinahanglang makapanghugas sa tanan tang kasal-anan sa dili pa kita mobalik sa abog aron ang atong kalag may dakong luna didto sa langit. Ug dapat sugdan dayon kay walay nasayod kanus-a ra kita kutob ning kalibotana.