Ang Regional Development Council (RDC) mipagawas sa ilang development plan alang sa Rehiyon 7. Kining maong plano mao ang mogiya sa pangkalamboang pisikal ug pagpataas sa rehiyonal ug sub-rehiyonal pinaagi sa pagpalambo sa pagpakiglambigit sa mga nagkutay nga urban centers.
Ang kutay o network sa urban center gibahin ngadto sa unom ka mga sento nga gilangkoban nining mosunod: Metropolitan nga nakabase sa Metro Cebu. Ang Metro Cebu gilangkoban kini sa pito ka siyudad sa Cebu, Mandaue, Lapu-Lapu, Talisay, Naga, Carcar ug Danao ug unom ka lungsod sa San Fernando, Minglanilla, Cordova, Consolacion, Liloan ug Compostela o gikan sa habagatan hangtod na sa amihanang bahin sa lalawigan sa Sugbo.
Ang metropolitan magsilbi kini nga economic, administrative, financial and logistic center sa Visayas ug primary international gateway.
Ang regional center nakabasi sa Tagbilaran ug Dumaguete City. Magsilbi kini nga unang agianan alang sa probinsiya nga nagsuporta sa ekonomiya sa rehiyon.
Adunay sub-regional center nga gilangkoban sa Bogo-San Remegio, Toledo-Balamban ug Tuburan. Magsilbi kini nga tourism hub, industrial center, higher education center, agri-industrial center o kombinasyon ani nila.
Ang provincial center gilangkoban sa Larena sa Siquijor, Ubay ug Jagna sa Bohol ug Bais - Tanjay, Bayawan ug Guiholngan sa Negros Oriental. Sila ang merkado ug service center sa probinsiya.
Ang urban service maoy magsilbing pinakahaum nga dapit sa urban development sa kalungsoran nga nagsuporta sa sub-provincial/district economy. Gilangkoban kini sa mga lungsod sa Tabuelan, Carmen, Argao, Moalboal ug Santander sa Sugbo; Ayungon ug Mabinay sa Negros Oriental; ug Carmen ug Talibon sa Bohol.
Ang special service – nahimotang sa isla sa Carlos P. Garcia sa Bohol ug Camotes ug Bantayan sa Cebu – mao ang maghatag ug limitado nga urban service.
Kining maong Regional Development Plan ipatuman sa Regional Development Council gikan ning tuig 2023 hangtod na sa tuig 2028. Kun ugaling mapatuman ang maong plano, makatabang kini sa paglambo sa kalungsoran.