Inanay nang nakita ang dakong kausaban sa merkado sa Carbon diin nahimo na usab kining adtoanan sa mga turista.
Gawas nga usa kini sa maisip nga tipik sa tatak sa dakbayan sa Sugbo, nag-level up usab ang mga kausaban nga gipatuman.
Mora’g lisod sa sinugdanan nga bag-ohon ang naandan nga Carbon.
Apan pinaagi sa paningkamot sa mga nagdumala karon sa pakig-alayon sa lokal nga kagamhanan ug sa pribadong sektor inanay nang nahatagan og katumanan ang kabag-ohan alang sa kalamboan.
Sama nalang sa interim building nga dili alang sa mga baligyaanan sa mga produkto apan sa kinaibabwan or roof deck niini adunay estraktura nga gipakisama sa nasud sa Singapore diin nahimutang ang merlion nga paborito sa mahilig sa selfie o hulagway.
Nindot ang view kay gawas sa merlion statue, makita usab ang iconic CCLEX bridge, mora’g perfect symbol sa Singapore-like Cebu City.
Gipanag iya kini sa pribadong negosyante nga nagbutang og kan-anan sa taas sa interim building nga nakadani sa mga bisita.
Kinsay magdahum nga dunay mainterest nga mga tawo nga mosuroy dinhing dapita nga kanhi gikahadlokan sa mga bisita gawas lang kong mangmpra og mga produkto.
Samtang ang mga vendors ug ang mga suki nila naka-adjust naman sad sa bag-ong Carbon nga mas limpyo ug tawhay ang palibot.
Ang karsada luag na sad nga dili ka mahadlok nga masaghiran ka kay nakontrol na sa mga otoridad ang palibot.
Layo kaayo kini og kalainan kaniadto. Ang baligyaanan sa mga karne ug isda nalang seguro ang kinahanglan mas palamboon pa.
Hinuon mao na kini ang isunod nga mas limpyo ang agianan sa mga mangomprahay ug mismo sa mga vendors.
Dugang parking area ang ibutang aron mas modugok ang mga tawo dili lang mangompra kon dili kadtong buot mosuroy sa dapit.
Mahitabo gyud ang kausaban kong bukas lang usab ang katawhan ug mobiya na sa naandan nga gakalandrakas lang.