Buot ko untang magdali
Duna toy misa nga akong gisaulog alang sa usa ka tunghaan didto sa bukirang barangay nga sakop sa akong parokya.
Human sa misa nangaon mi kuyog sa mga Magtutudlo. Dunay katekista nga niduol kanako tungod kay duna siyay pahilogan.
Naa pa ra ba koy laing schedule, apan nihapit ko sa hiloganan, Ug sa dihang akong naabtan ang hingtungdang masakiton daw sa gibati ko og dakong kaluoy kaniya, naglisud siya og ginhawa ug luya na kaayo siya. Mao to nga ako siyang gihilogan.
Kadaghanan kanato labina ning mga panahona sa kabag-ohan ang buot mamahimong madali sa bisan unsa nga atong pagabuhaton. Buot kita nga mamahimong tag-iya sa atong panahon, buot kita nga mamahimong maoy magbuot sa atong panahon, apan dunay mga panahon nga kita kinahanglang mo slow down diha sa atong panaw sa kinabuhi.
Pinaagi lamang niining maong paghinay mas makita nato sa mas tataw nga paagi ang atong kaugalingon diha sa atong kalambiitan sa uban ug sa atong Ginoo mismo. Basin paspas kaayo ang atong panaw apan wala na nato hinuon ma appreciate ang matag yugto nga atong naagian. Daghang mga kasinatian ang nausik, daghang mga kasinatian nga wala mahatagi og gibug-aton.
Ang atong mga pag-ampo usahay mamahimong paspas apan dili dulot sa kasingkasing. Ang Dios wala makighinabi kang Elias diha sa linog, dalugdog ug kagahob. Ang Dios nakigkukabildo diha sa kahilom ug kalmadong huyohoy sa hangin, dili tanang paspas pagaisipon nato nga seguro,
PANGAMUYO
Ginoo buot kaming makighimamat kanimo lamang. Himoang malinawon ang among kasingkasing, himoang malinawon ang among hunahuna. Diha sa kahilom Ginoo sulod sa among kinabuhi. Amen.