Naukay ang mga tawo ilabi na sa Dumlog, Talisay City sa lalawigan sa Sugbo tungod sa gikahadlokan sa mga bata nga ilang giingon nga manananggal.
Gihulagway sa duha ka bata nga nakakita sa manananggal nga puwa kini og mata. Daw dili gayud matukib ang gibati nga kahadlok sa mga bata.
Ang pagbaniog sa manananggal sa Dumlog, dakbayan sa Talisay City niabot sa Kapuso Mo Jesica Sojo (KMJS) ug napasalida niadtong miaging adlaw nga Domingo.
Samtang nag-imbestigar ang kapolisan, dugang katingad-an ang mitumaw sama sa babaye nga nagtuwad ug agta nga siga ang mata.
Pila lang ka adlaw ang milabay laing katingad-an ang nahitabo sa lungsod sa Tuburan, lalawigan sa Sugbo diin gilubag sa tawo nga baboy og ulo ang ulo sa baka nga gipanag-iya sa barangay tanod. Una niini sa mao gihapon nga lungsod adunay kanding nga matud pa gikuhaan lamang og ginhawaan.
Maka-relate ko ning kanding nga gikaon ang sulod sa ginhawaan tungod kay mao pod kini ang nahitabo sa akong manok ug pabo igo rang gikuhaan sa ilang sulod sa ginhawaan ug dayon gibiyaan.
Daghan nag ingon nga maral ang nagkaon sa akong manok ug pabo samtang ang uban nag-ingon nga hawo ang mikaon.
Ang istorya nga ingon niini sukad pa kini sa atong katigulangan ug napasa-pasa sa bagong henerasyon. Sigun sa mga nagtuon, ang mga istoryang manananggal, tikbalang, ungo, pari nga walay ulo ug uban pa istorya kini nga mugna lamang sa mga ginikanan sa karaang panahon agi og panghadlok sa mga bata nga magpabadlong.
Apan sa ka moderno na sa panahon aduna gihapon moinsister nga tinuod kini ug basi kini sa kasinatian sa mga tawo nga nakakita gyod mismo.
Sigun sa akong nakita sa dagway sa mga bata nga daw dili matukib ang kahadlok nga ilang gibati makaingon kita nga tinuod. Apan hangtod dili madakpan ang manananggal ug tawo nga baboy ang ulo magpabilin gayod ang atong pagduda nga dili kini tinuod.