Wa kokabantay ini sa mga balita sa tradisyonal nga media, pero nikatap karon sa social media ang letrato ni Tourism Secretary Christina Frasco nga nanghatag og gasa nga pagkaon gikan sa Sugbo ngadto sa mga delegado sa ASEAN Tourism Forum 2023 sa Yogyakarta sa Indonesia niadtong Pebrero 4.
Nakapa-ukyab sa pipila sa mga nakakita ang letrato kay: Una, mga produkto sa Titay’s (nga gipanag-iya sa iyang pamilya) ang gipanghatag; ug ikaduha, gipapilitan og card nga dunay dagway nilang Secretary Frasco ug sa iyang bana nga si Kongresista Duke Frasco.
* * *
Ang letrato gi-post sa Facebook ni Alvin Tan, ang Minister of State for Culture, Community and Youth sa Singapore. Ang taga Manila nanaway nga epal si Frasco. Nganong letrato man nilang magtiayon imbes lehitimong tourist destinations sa Sugbo ug Pilipinas ang gipasundayag?
May mga higala hinuon ni Frasco nga nidupa dayon. Gibasol nila ang staff sa Department of Tourism (DOT) nga tingali nakalimot sa pagbutang og laing card. Kay ang card nga dunay letrato sa magtiayon maoy gipapilit sa samang gasa nga gipanghatag sa mga Frasco sa ilang mga higala.
* * *
Way makakuwestiyon sa magtiayong Frasco sa way dapig-dapig nga pagpili sa ilang kaugalingong mga produkto isip gasa sa ilang mga higala. Pero lahi na ang istorya kon ang Titay’s gift packages gikompra sa kuwarta sa DOT para sa mga nanambong sa opisyal nilang kalihokan.
Pero kon gikan sa pribadong bolsa sa mga Frasco ang bayad sa mga gasa, ug sa tumang kahinangop ilang gi-donar ngadto sa gobyerno, daghang salamat sa ilang kamanggihatagon.
* * *
Mahimong nakumbinser si Secretary Frasco, tungod sa ilang pagdaog sa nangaging mga eleksiyon, nga nahinangop ang taga Liloan sa naandan nga pagbutang sa ilang mga nawong sa mga gasa, mga upisina, munisipyo, mga proyekto ug bisan sa unsa nilang mga pahibalo.
Hinaut nga may makahunghong ni Secretary Frasco nga ang taga Singapore ug mga delegado sa ubang kanasuran mahimong di sama kalingaw sa ilang mga nawong. Ug hinaot nga matarung sa pagpasabot ang Commission on Audit (COA) kon buhis sa katawhan ang gibayad sa Titay’s: Duna bay subasta; o, kon dinalian ang transaksiyon, gihatagan ba og higayon ang ubang suppliers.
* * *