Napikal na gyud ang kadagkoan sa Metro Cebu Water District (MCWD) ngadto sa JFAP Construction, nga ilang gikontrata paglubong og dagkong tubo sa tubig gikan sa Barangay Busay paingon sa Lahug.
Giingnan ko ni MCWD General Manager Edgar Donoso nga gihatagan na nila’g ultimatum ang JFAP Construction nga humanon na gyud ang ilang proyekto sa dili pa ang Pebrero 28.
Sus, kapin sa tuig na ang P115 Million nga pipe-laying project sa JFAP bisan unta ang gitas-on sa lubngan nila’g mga tubo miabot lang og 2.7 ka kilometros ang gilay-on.
Ang JE Hydro Bio-Energy Corporation gani nga maoy gikontrata pagdala sa tubig gikan sa Barangay Lusaran paingon sa Busay, kaniadto ra’ng Septiyembre nakahuman sa ilang proyekto bisan nga 25 kilometros ang gilay-on niini.
Ngano man ni? Ang tubag daghan og mga trabahador ang JE Hydro, samtang ang JFAP maihap lang sa tudlo ang ilang mga trabahador.
Ang JE Hydro mipuhonan tawon og P1.3 Billion sa proyekto nila nga paghatud sa tubig gikan sa Lusaran paingon diha sa Barangay Busay, aron unta isumpay ang ilang mga tubo ngadto sa tubo nga gitrabaho sa JFAP.
Kay wa pa man makahuman ang JFAP sa proyekto nga gikontrata kanila, wa pa tawon makakwarta ang JE Hydro, mao nga wa pa tawon sila makabawi sa ilang dakong gasto.
Malangay gyud ang proyekto sa JFAP kay makita man nimo nga panahon sa adlaw, way nagtrabaho sa angayan nilang trabahoonon.
Buyno, lauman na lang nato nga mahuman na ang gitrabaho sa JFAP aron nga mokusog na ang bul-og sa tubig sa mga kunsumidor sa MCWD diri sa Busay, Apas, Lahug ug kanait nga mga dapit.
* * *
Saludo ko ni MCWD Chairman Joey Daluz kay samtang gisaulog niya ang iyang birthday kaniadtong Martes, didto niya kini sauloga sa bukid, sa dapit nga gipahimoan niya’g kapilya.
Nahimutang kini kilid sa usa ka bungtod sa Barangay Pamutan, bukid ni nga barangay nga mga walo ka kilometro gikan simbahan sa Guadalupe.
Nagpasabot lang gyud ni nga relihiyoso nga pagkatawo si Atty. Daluz. Pinaagi sa iyang gihimo, molig-on pa ang pagtuo sa taga didto ug matudloan ang kabataan nga mosimba gyud kanunay.
Human sa misa nga gitambongan sa daghang tawo, apil ang mga bisita nga gidapit ni Daluz, ang katawhan mipaingon sa ubos nga bahin diin didto nagpaabot ang giandam nga mga pagkaon.
Boodle Fight nga matang sa kinan-anay ang nahitabo nga nakahatag og dugang kaalegre. Makita nako sa panagway sa mga taga bukid ang ilang kamaya nga may kapilya na sila, ug nakakaon pa gyud.