EDITORYAL - DILG maoy angay mosusi sa City Jail

Dako kaayong eskandalo sa Bureau of Jail Management and Penology -7 partikular ang mga sakop sa Cebu City Jail Male Dormitory kining alegasyon nga sakop ra nila ang nalambigit sa pagpalusot og cellphones bugti sa dakong bayad sa dunay kwartang inmate.

Ang tanang gadgets gidili sulod sa maong pasilidad sama sa cellphones, laptop, tablets, radio ug uban pa. Apan makahibulong kun nganong duna man gyuy masakpang mga sama niini diha sa sud mga nanglabay nga mga greyhound operations.

Giunsa sa pagpasulod nga unta estrikto man kaayo ang paghiling sa tanang pangdad-on sa sud. Kung ang mga gadgets sama sa cellphone makalusot, labaw nang makalusot diha ang illegal nga drugas nga gipangbahig na sa gagmay nga pakete.

Kung ang mga dalaw ug ilang mga gipangdala estriktong rekisahon, giunsa man diay kini pagpasulod?

Duha ray posibleng makadala niana sa sud, mga personnel mismo sa BJMP ug ang mga service personnel nga gibayran basi sa ilang serbisyo diha sa pasilidad sama sa mga tigluto sa pagkaon ug mga alalay, tigpangompra sa suplay, maintenance sa elektrisidad sa sud ug daghan pang uban.

Niining mga tawhana, dunay nasuhito sa seguridad sa maong pasilidad, kanang kamao kun asa ang buslot.

Walay seguridad nga perpekto, duna gyud kini buslot ug ang nakahibalo niini mao ang mismong naghan-ay ug tigpatuman sa seguridad sa pasilidad.

Bisan og moapil pa og imbestigar ang PNP pagpangita kinsa kining mga jail personnel nga tigpalusot og kontrabando, maglisod sila kung dili mokooperar ang BJMP o mga personnel sa city jail.

Naa man gud ng kulturang “lahi sila og ahensiya” ug magtabunay ang usa’g-usa aron dili makutaw ilang grupo.

Apan magmalampuson lang kini kun mismo ang mga labaw sa BJMP sa taas maoy mangunay ug diniyoson pagpangita kinsay sad-an.

Mas labing maayo kun mismo ang DILG diin parehong nasakop ang BJMP ug PNP, maoy direktang momando og imbestigasyon.

Aning paagiha, manginto ang tanan ug maninuod. Mag-iyahay sila og luwas sa ilang kaugalingon ug ilang kaugmaon.

Anha na hinay-hinay moluag ang ilang mga dila paghatag og impormasyon nga pwedeng tipunon aron makahimo og konklusyon aron makasulbad sa problema.