Kadaghan na ta makadungog gikan sa mga madakpan nga durugista nga gikan sa Cebu City Jail ang ilang supplier.
Gamit ang cellphone makahimo sa pagpadayon sa iyang illegal nga kalihokan bisan ang usa ka piniriso.
Apan luyo niining maong kasayuran ug sa kadali ra gyud unta sulbaron sa problema sanglit kontrolado man sa kagamhanan pinaagi sa Bureau of Jail Management and Penology (BJMP) ang facility, inutil ang mga awtoridad pagsulbad sa problema.
Ug sa makadaghang higayon mitumaw ang pangutana, nganong di mabadlong sa BJMP ang pagpayuhot og mga kontrabando sama sa cellphone sulod sa prisohan?
Sa ka istrikto sa ilang mga gwardiya diha sa ilang ganghaan nga hasta ang kinatawo sa babaye kun mahimo ilang bukikion aron susihon wa bay kontrabando nga gisipitan, imposible gyud nga dunay makasulod nga mga butang nga gidili.
Ang dugay na nga pangutana sa publiko natubag sa gibulgar sa usa ka dinakpan sa kapolisan karong bag-o. Matud sa dinakpan nga kanhi priso sa City Jail, dako diay'ng negosyo sa mga kurakot diha sa City Jail ang pagpayuhot og cellphone.
Kun tuohan ang pamahayag sa kanhi priso P50 mil ngadto sa P60 mil ang pangayo sa mga kurakot aron makabaton og cellphone ang usa ka binilanggo.
Dakong kantidad nga ang mga adunahan lang nga piniriso ang makabayad. Busa dili tinuod imposible nga ang mga drug lord sulod sa prisohan makapadayon sa ilang illegal nga negosyo bisan tua sila sa sulod tungod kay makabayad man sila aron makabaton og telepono.
Ang tigpamaba sa City Jail nga si Jail Officer 3 Blanche Bation gikutlo sa report nga nagkanayon nga abli ang ilang buhatan alang sa imbistigasyon gikan sa ubang mga ahensiya sa gobiyerno.
Masabot sa pamahayag ni Bation nga daw sa dunay sistema nga gisubay ang mga tagdumala sa City Jail gawas sa naandang proseso ug sistema sa gobiyerno.
Inay manghunaw sa ilang responsibilidad pagpanglimpiyo sa kaugalingong nataran ug ipasa gilayon sa laing ahensiya ang paghimo sa pakisusi, mas maayo og gihatagan sa City Jail ang publiko og kasigurohan nga ilang susihon ang kasayuran ug silotan si bisan kinsa nga mamatud-ang nalambigit sa tinunto.
Ug mas motuo ang publiko nga seryoso ug way kalambigitan ang dagkong mga opisyal sa City Jail kun dunay mga mapasakaan og kaso ug mataktak sa katungdanan.