Parehistro na mo

Miabot na og usa ka milyon ug usa ka gatos ang mga nagparehistro nga botante alang sa umaabot nga barangay ug Sangguniang Kabataang eleksiyon sa Oktobre ning tuiga nga gisugdan niadtong Disyembre 12 sa miaging tuig. Kini ang gitug-an ni Comelec Chairman George Garcia.

Ang pagpangrehistro matapos na karong Enero 31, 2023 ug pila na lang ka adlaw gikan karon. Seguro ko daghan pa ninyo ang wala pa marehistro, gusto nga mobalhin sa inyong rehistro ug gusto nga magpabalik sa inyong rehistro busa ayaw ninyo paabota nga moabot na ang kataposang adlaw sa pagpangrehistro aron malikayan ang kahasol ug kahuot sa dapit diin kamo magparehistro.

Ang Commission on Election o Comelec nagpahibawo nga ang pagpangrehistro sa dakbayan sa Sugbo ila kining gihimo sa Robinsons Galleria sa North Reclamation Area gikan sa alas 10:00 sa buntag hangtod sa alas 5:00 sa hapon gikan sa dalaw nga Lunes hangtod sa adlaw nga Sabado.

Sa Mindanao adunay lugar nga hinay ang dagan sa ilang pagpangrehistro tungod kay kasagaran sa mga magpapili sa umaabot barangay ug Sk eleksiyon walay mga kontra.

Dili unta ingon ani ang huna-huna pod sa uban.

Ang pagparehistro alang sa eleksiyon dili lang alang sa umaabot nga barangay ug SK eleksiyon kun dili hangtod na kini sa mga umaabot pa nga eleksiyon.

Pila nalang ka adlaw ang nahibilin mapupos na ang rehistrasyon busa dili magpaabot nga moabot na ang adlaw sa pagpangrehistro una pa magparehistro aron dili magbagulbol ug manaway sa Comelec kay wala maatiman ug naghuot ang pagpangrehistro.

Aron luag, hamogaway, dili hassle ug layo sa away hala pagparehistro na kamo sa Comelec ug kun kamo taga dakbayan sa Sugbo adto kamo sa Robinsons Galleria sa may North Reclamation Area.

Kun ugaling wala mo marehistro kay naabtan o nahutdan sa oras sa pagpangrehistro ayaw mo pagmahay sa comelec hinuon mahayi ang imong kaugalingon.