EDITORYAL - Modernisasyon sa AFP

Mipadayag si Presidente Ferdinand Marcos Jr. nga ang tension karon sa Taiwan Strait niadtong Agosto sa nakalabay nga tuig “ very, very, very worrisome.”

Iya kining pamahayag atol sa interbyu kaniya sa Financial Times atol sa pagtambong niini sa World Economic Forum sa Davos sa nasud sa Switzerland.

Angay lang mabalaka si Marcos tungod kay adunay sobra 150 mil ka mga overseas Filipino workers didto karon ning mga panahona. Unsaon nalang man pag-evacuate sa ingon niini kadaghang mga tawo sa labing daling panahon.

Hinuon, duol ra ang Taiwan sa Luzon partikular sa probinsya sa Batanes, apan dili man pwedeng languyon ang Bashi Channel, magkinahanglan og dagkong barko ug abyon alang sa dinaliang pagpabakwit.

Dili man tingali mopahibalo ang China nga ilang atakihon ang Taiwan aron duna pay oras mahakot pauli sa Pilipinas ang mga OFW.

Gawas sa kahimtang sa mga OFWs, hunahunaon sab unta ni Marcos ang implikasyon niini sa seguridad sa Pilipinas ug ingon man ning bahina sa Asya Pasipiko.

Ang Bashi Channel nga nag-ulang sa Batanes ug sa kina-habagatang bahin sa Taiwan maoy lutsanan sa mga barko, submarino ug abyon sa Peoples Liberation Army-Navy padung sa Pasipiko kun niini atakihon ang US Bases sa Guam kun pananglitan magkagiyera.

Ang US bases sa Guam, sa Okinawa, Japan ug sa South Korea dunay mga abyon ug mga barkong nakita ng daan sa China nga babag sa pagatake nila sa Taiwan.

Apan dili lang ang maong mga lugar ang dunay gamit panggubat ang US, dinhi sa Pilipinas adunay mga kampo sa mga Amerikano nga gipangtukod nga kabahin sa kasabotan sa duha sa Enhance Defense Cooperation Agreement (EDCA) ug Visiting Forces Agreement (VFA).

Kaning mga kampoha, posible sab kining atakihon sa China ug kun mahitabo kini maduhig gyud ang Pilipinas sa gubat.  Ang AFP pinaagi sa Department of National Defense naa karon sa sitwasyon nga naggukod pagbaton og mga modernong armas ug gamit pangdepensa sa nasud.

Seryusong nasugdan ang AFP Modernization sa panahon ni kanhi anhing presidente Benigno “P.Noy”Aquino  nga nakompleto ug gipadayon sab sa panahon ni kanhi presidente Rodrigo Duterte.

Napuslan ang maong mga gamit karon apan kuwang pa kaayo. Kinahanglang padayunon kini ni Marcos ug palabwan aron pagsigurong ang Pilipinas makapanalipod sa kaugalingon.