Nagpakabana sa karsada

Isip sakop sa Cebu City Traffic Management Board, nagpakabana ko sa kahimtang sa mga karsada nga nakahasol kaayo sa mga motorista.

Ang kadagkoan sa Department of Public Works and Highways (DPWH) maoy gitugyanan sa pag-atiman sa national roads, apil niini ang pagtapak kon may mga libaong.

Ambot og miabot ba kaha sa utok sa mga opisyal sa DPWH nga ang mga libaong ug dagkong lungag sa karsada, makadisgrasya kini og mga sakyanan.

Mao nga awhagon nako ang kadagkoan sa DPWH nga maghimo kamo og grupo sa inyong mga kawani nga motapak sa mga lungag diha sa karsada.

Ang mga driver maningkamot intawon sa paglikay sa dagkong mga libaong, ug sa tanto nila nga paglikay-likay, may higayon nga magkadinam-agay na hinoon.

Kon ang DPWH motuman lang gyud unta sa ilang mga tahas, nindot gyud unta ang atong mga karsada. Kini maoy rason nga sa miting namo sa Traffic Board karong Martes, giimbitar namo nga motambong ang DPWH city district engineer.

Diri sa Veterans Drive unahan sa Marco Polo Hotel, daghana nga mga lungag sa karsada nga peligro tawon kaayo, ilabi na panahon sa tinguwan.

Ang mga lungag sa karsada masudlan og tubig kon mag-uwan, ug kon adunay mga driver og motorsiklo nga dili suheto sa maong mga dapit, mabuwasot tawon ang ilang ligid ug hayan madisgrasya.

Di ba kamo maluoy nga ang mga tag-iya og sakyanan nagbayad og Road User’s Tax unya wa ninyo ayoha sa paggasto ang kuwarta nga gibayad nila aron maatiman ang mga karsada?

* * *

Kon ang tanang mga kawani sa kagamhanan magtuman lang gyud sa ilang mga katungdanan, nindot gyud unta ang atong kahimtang.  

Ang mga kawani sa kagamhanan nga nadestino sa lainlaing mga ahensiya ug mga opisina, managlahi ang katungdanan nga gitahas kanila.

Kon himoon lang gyud nila ang mga trabaho nga gisangon kanila, pagka nindot. Mao man bitaw nga kaming mga dili kawani sa gobiyerno, apan gihatagan og mga katungdanan, mipakita gyud sa among kinasingkasing nga serbisyo.

Isip sakop sa Traffic Board wa mi sweldo nga gidawat, apan nigahin mi og oras aron paghisgot sa mga pamaagi nga posibleng makapausab sa sistema sa trapiko.

* * *

Yuna pa, gibadlong diay nako ang duha ka traffic enforcer nga nadestino sa eskina Sudlon, sa Gorordo Avenue kay nagtupad sila ug nagsultihanay ra sud sa usa ka oras.

Dili lang usa nako ibutyag ang ilang mga ngan, di lang usa ko mohimo og estrikto nga lakang, basta dili na nila usbon ang ilang binuhatan.

Wa sila magbantay pagpatunhay sa trapiko kay didto ra sila sa layo nagsultihanay kapin sa usa ka oras.