Husto si Cebu City Mayor Michael ‘Mike’ Rama sa iyang pag-ingon, nga ang pag-implementar og signal shutdown panahon sa ipahigayong Sinulog Festival 2023 didto sa South Road Properties (SRP) ning umaabot Domingo, Enero 15, alang sa seguridad sa katawhan, usa kuno ka kinaraang paagi. Busa, wala na kinahanglana.
Importante ang linya sa komunikasiyon, ilabi na oras sa emerhensiya. Ang selpon ug ubang matang sa gadgets gituyo paghimo aron si bisan kinsa nga atua sa halayo, sa bisan asang suok sa kalibotan, makuhit-mapahibalo sa lab-as panghitabo nga gusto natong ipaabot pinaagi lamang sa pagtulpok-pagkuhitkuhit ning modernong kahimanan.
Kay simbako panahon sa Sinulog, sa usa ka dapit adunay nakakita nga may dalagang gilugos sa mga bugoy, adunay nagdalag armas, unya gusto niyang pahibaw-on ang kapolisan, pero walay signal iyang selpon, kinsa mang polisa ang moadto-responde?
Dili ba maisip hinuon, nga oras naay emerhensiya diin ang mga polis gikinahanglan, tungod sa ‘signal shutdown’ morag nahalikay na hinuon sila sa ilang obligasiyon?
Tiaw bay, sa gutlo nga adunay manawag aron unta magpatabang nila, sila, cannot be reached?
Dili ba pareha ra kini sa nakaparadang firetruck, diin dihang gipaandar na aron tubagon ang alarma sa sunog, wala gyod moandar, kay diay, tangke walay gasolina?
Ang firetruck ug cellphones pulos kahimanan para emerhensiya.
Dili kini puwedeng kuhaag gasolina o signal sa linya sa komunikasiyon. Kay ang pagbuhat sa ingon, nahisama rang imong gikuha ang kahigayonan sa pagluwas og mga kinabuhi nga nagpaninggit-panawag og panabang panahon sa kalit lang kaayong panghitabo.
Busa, eksakto kaayo si Mayor Mike sa iyang hugtanong pagsupak sa ‘signal shutdown.’ Makadaot tuod kini sa ekonomiya tungod sa daghang negosyo nga maapektohan.
Samtang vloggers, cellphones and social media users, kinsa nakabati sa pamahayag sa mayor, nakadayeg. Sanglit, dili na man mabahaw ang ilang pag-post ‘live’ sa tanang relihiyosong kalihokan atol sa Sinulog 2023 parade ug Sinulog competition dance ubos ug ibabaw sa entablado.
Lakip si Police Regional Office 7 Director Brigadier General Jerry Bearis mipadangat sa iyang suporta sa ‘No signal shutdown’ nga desisyon sa mayor. Iya kuno kining irespeto.
Gumikan ning maong pagsinabtanay, sila gipakpakan sa katilingbang nangalipay. Unta, nindot nilang relasiyon magmakanunayon. Ug dili molubad!