EDITORYAL - SIM Card registration

Nagsugod na ang pagparehistro sa mga SIM cards niadtong Disyembre 26 sa tungang gabii. Nakaproblema dayon ang duha ka higanteng telecommunication companies pag-atiman sa mga gustong magpa-rehistro sa pagsugod palang sa rehistrasyon.

Ang tumong niining pagpa-rehistro mao ang seguridad para sa tanan. Maayo ang katuyoan niini kun dili lang abusaran sa mga naa sa gobiyerno.

Tungod kay kining pagpa-rehistro sa pangalan ug mga importanteng impormasyon sa subscribers  posibleng magamit sa binuang niadtong makamaong moutingkay sa web.

Gani, daghan na ang nabiktima sa mga hackers tungod nakakuha og mga impormasyon sa subscribers pinaagi sa numero sa ilang cellphones nga mao na say gigamit sa pag-beripika sa mga transaksyon nga gipaagi online.

Ang gobiyerno mihatag og 180 ka adlaw para sa tanang subscriber, prepaid o postpaid accounts sa pagpa-rehistro gyud sa ilang mga numero sa telco provider.  Ang Abril 26 sa sunod tuig mapupos ang rehistrasyon.

Apan sa unang oras palang sa registration mikagar dayon ang portal sa Globe ug PLDT-Smart tungod sa kadaghan.  Ang mga kadagkoan sa maong telcos mipasalig nga ilaha kining palambuon aron dili malangay ang pagparehistro.

Sa pagparehistro , kinahanglan lang ang pangalan, address, adlaw nga natawhan ug balidong government issued IDs. Sa mga naa na niini, wala kini problema.

Apan sa mga wala pa gyud makakuha og government issued IDs, unsaon nalang nila kini pagparehistro nga otomatiko mang di kapasar ang kuwang og mapresentar nga dokumento.

Sa pagkakaron bisan ang National ID nga gipang-isyu wala pa gihapon makompleto sa pagpadala ug gani, ang uban papel nalang maoy gipadala inay nga kadtong PVC IDs.  Magkaproblema gyud niini ang mga tawong walay government issued IDs. Ang uban kanila mga nagpuyo sa mga hilit nga lugar nga nagsalig lang sa keypad nga cellphone isip komunikasyon sa gawas sa ilang dapit.

Sa pikas bahin, milyones pesos sab ang mawala aning mga telcos kun kining ilang mga subscribers nga dili makaparehistro maputlan sa ilang telepono.

Maayo tingaling karon palang, pangitaan na kini og solusyon sa mga hingtungdan, mga telcos man o sa ahensiya sa gobiyerno nga gitahasan pagpatuman niining SIM card law registration.