EDITORYAL - Kawsa sa NPA di na sama kalig-on kaniadto

Kagahapong adlawa gisaulog sa Communist Party of the Philippines ang ilang ika-54 ka anibersaryo. Apan mao pa ba gihapon ang kadasig sa mga miyembro niini sama kaniadto?

Ang selebrasyon karon mao ang labing una nga wala ang ilang supremo, si anhing Jose Maria Sison kinsa namatay didto sa The Netherlands sa wala pa ang Pasko. Si Sison pila ka dekada nang nagtago didto sa maong nasud, apan duna gihapon kini kontrol sa mga kalihokan. Ang Armed Forces of the Philippines masaligon nga karong wala na si Sison nga ilang gibansagang babag sa mga peace process, daghan nang mga miyembro sa NPA ang motahan ug mobalik sa sabakan sa balaod.

Gawas sa pagtahan, daghan na sa mga dagkong opisyal sa CPP-NPA-NDF ang napatay na sa militar. Gatosan na ka mga sakop sa NPA ang mitahan ug gitabangan sa gobiyerno nga makabalik sa sistema. Mas midaghan pa gyud kini sa dihang gikonsiderar sa gobiyerno nga ang insurhensiya usa ka local nga isyu ug dili kinahanglang nasudnon ang pagtratar. Ang liderato sa CPP-NPA- National Democratic Front, ilabi na si Sison, dili gusto niini.

Apan nakita sa gobiyerno nga ang pagtratar sa insurhensiya isip usa ka nasudnong isyu maoy rason nganong dili makab-ot ang kalinaw. Kini tungod kay maglisud ang gobiyerno paghatag og kompromiso o gusto para kalihokan kay dili man kini madawat sa uban sanglit ang matag rehiyon nga dunay NPAs dili parehas og gustong mahitabo.

Karong giisip sa gobiyerno nga lokal ang problema sa matag probinsya nga dunay NPA, mas napaminaw direkta ang indibidwal nga yangungo sa matag miyembro ug mas napasayon sa gobiyerno ang pagsulbad niini. Kini maoy rason kun nganong daghang NPA ang nagpanon sa pagtahan, tungod kay ang ilang mga gipangayo ug reklamo napaminaw naman direkta sa mga lokal nga otoridad inabagan sa nasudnong kagamhanan.

Sa naghinapos nga bahin sa kinabuhi ni Sison, nasaksihan niya ang hinayhinay nga pagka-gabok sa pundasyon sa ilang kawsa. Wala na siya paminawa sa mga kadre, mga opisyal sa NPA ug ordinaryong miyembro. Kun magpadayon kini nga pormula sa gobiyerno, dili madugay mawad-an og impluwensiya sa ilang mga sakop sa lokalidad ang liderato sa CPP-NPA-NDF ilabi na nga karon wala na si Sison.