EDITORYAL-Maayong Pasko natong tanan!

Unyang tungang gabii sugaton nato ang Pasko, ang selebrasyon sa pagkahimugso sa Manluluwas sa tinuohang Kristiyano. Mayoriya sa Pilipinas mga sakop sa Simbahang Romano Katoliko ug gipaabot nga magsadya ang tanan aning mga panahona.

Apan sa pagselebrar niini, kinahanglan ang tanan nga mag-amping ug dili magpasagad tungod kay bisan pa man dunay kasaulogan, naa kanunay ang peligro, gikan sa sunog, sa aksidente sa pabuto, saag nga bala, pagka-hospital tungod sa sobrang pagkaon sa mga gidili, ug labaw sa tanan ang sunog.

Karon nga nalibkas na halos tanan ug gani mibalik na gyud sa normal ang kinabuhi sa mga Pilipino human sa duha ka tuig nga pandemiyang dala sa Covid-19, gipaabot nga grandiyoso gyud kaayo ang pagsugat sa Pasko karong tuiga.

Adunahan man o kabus, sigurado gyung magselebrar bisan unsa pa ilang naandam nga saw-an diha sa lamesa unyang tungang gabii.

Sa kadtong wala gyud gihapoy ikahanda, malipay ug mapasalamaton nalang man sab sila nga maayo nalang nga nabalik na sa normal ang tanan karon sanglit makapanikay-sikay na sila sama sa kaniadto.

Apan ato untang hinumdoman nga ang pagsaulog sa pagsugat sa Pasko dili pa-engrandehay og dayan-dayan nga sugang dagitabnon sa mga balay, mga napatong-patong mga mga regalo ug gasa, naglanog-lanog nga pabuto, pakusganay og sound systems, namungingi sa pagkaon nga lamesa, pagkaloro sa ilimnong makahubog ug daghan pang uban.

Ang Pasko mao ang paghinumdom sa pagkatawo sa Manluluwas, adlaw sa paglaum ug adlaw sa pagpasaylo niadtong mga nakasala kanato.  Adlaw sa pagpaambit ngadto sa mga wala. Gikan dinhi sa Banat News, maayong Pasko kanatong tanan!