Katekesis no. 61

Ang Ginoo diha sa Tawhanong Kaliwat

Pinasikad sa: Mat. 1;1-17

Ang kaliwat mahinungdanon kun buot hunahunaon apan dunay kaliwat kun kaliwatan nga dili maisip nga hingpit ug pinakasakit paminawon mao nga dunay kaliwatan nga salawayon. Hinuon, ingon ini ang tawhanong banay dunay kahuyang ug kakulangan. Apan bisan pa man niini ang atong Ginoo nisulod sa atong tawhanong kasaysayan ug gani kun buot hunahunaon ang nakasulod sa kaliwat usab nga salawayon. Ngano man?

1.   Una, si Tamar ang gipaangkan sa iyang ugangan nga si Juda tungod sa kapakyas sa uwahi sa paghatag kaniya sa anak niini nga lalaki ingon nga iyang bana human mamatay ang iyang bana. Nagtakuban siya ingon nga usa ka dautang babaye. Nakigdulog si Juda kaniya ug nagbunga ang ilang panagdulog.

2.   Ikaduha, si David ang bantugang hari sa karaang tugon ang nangilog og asawa sa usa sa iyang mga heneral nga si Urias. Gawas sa pag-ilog sa asawa niini nangita siya og paagi aron mapatay si Urias pinaagi ni Joab nga nibutang kang Urias sa frontline sa panggubatan.

3.   Si Solomon nakabaton og daghang mga asawa. Ug ang maong mga asawa maoy hinungdan kun nganong si Solomon ang nisimba sa mga diosdios butang nga nakapasuko ni Yaweh.

4.   Si Rahab usa ka dautang babaye hinuon nahimong kaabin sa mga espiya nga maoy niilog sa yutang gisaad.

5.   Si Ruth usa ka Moabihanon. Apan naminyo sa usa ka Israelita.

Kini ang uban pang mga sanglitanan ang nagmatuod nga ang atong Ginoo diha sa pagsulod sa atong tawhanong kasaysayan ang walla magagikan sa banay nga hingpit. Niambit siya sa atong pagkatawo aron kita makaambit usab sa iyang pagka-Dios. Kini ang tinuod nga kahulogan sa Pasko sa pagkatawo sa atong Ginoo. Sa ato pa, dili siya Dios sa halayo. Dios siya nga sama gayud kanato hinuon hawa sa sala. Ning panahon dakong pagmaya atong hinumdoman nga kun anaa man ang atong kahuyangan, anaa ang grasya nga maoy atong gisaligan. Grasya nga mas labaw pa kaayo sa atong mga sala ug  kahuyang.