Giakusahan sa embahada sa China ang Amerika nga naghimo’g lakang nga mauwang ang relasyon tali sa China ug Pilipinas human mihimo’g pamahayag ang US State Department kabahin sa mga hut-ong sa Chinese vessels nga nanghilabot sa pagpanagat sa mga mga Pilipino diha sa Spratlys. Bisan niining maong kalamboan, anaa gihapon ang kamatuoran nga padayon ang pagpanghasi sa China sa atong mga mananagat. Apan inay moreklamo, may’pag maningkamot ang Pilipinas aron mo-asenso, molig-on ug mas mo-anindot pa kini kay sa China ug dayon i-post niya kini sa Facebook ug i-add ang China isip higala aron paibgon kini. Pagkatoytoy!
Unsay angay menosan?
Nagtuo si Cebu City Vice Mayor Raymond Alvin Garcia nga makab-ot ang giproponer nga P50 billion budget sa tuig 2023 pinaagi sa improved tax mapping ug collection, lakip na ang pagpausbaw sa bulohisan sa yuta. Ginaingon nga ang kagamhanan mao ang katawhan ug ang budget maoy nagpadayag ug motubag sa ilang panginahanglan. Apan ni’ng mitumaw nga kontobersiya sa bayad sa koleksyon sa basura, haum usab ang panahom nga, “Inay moingon ang politiko nga ‘kinahanglan daghan ang mahimo sa gobyerno’, maayo usab tingale hinuklogan sa politiko kon unsay ilang gibuhat nga angay usab menosan.” Mao man!
Uso ang peke
Gisikop sa mga awtoridad ang duha ka Cameroon nationals nga giingon’g nagpakatap og mga minî nga kwarta. Segun sa imbestigasyon, mogamit una og mga tinuod nga kwarta ang mga suspetsado sa ilang una’ng duha ka transaksyon sa dili pa nila gamiton ang minî nga kwarta. Ni’ng kabag-ohan, ang pagka-peke maoy uso ug ang tanan daw miduyog sa urog. Busa, gawas sa pagdagsang sa minî nga kwarta, midagsang usab ang peke’ng higala. Matud pa bitaw sa pagya, “mas maayo unta kon ang tawo parehas sa kwarta, nga pwede ra nimo itandang sa kahayag aron masuta kon tinuod ba kini siya o peke.” Muleeeng!
Albularyo lang sakalam
Adunay kakulang sa anti-biotic nga amoxicillin ug uban pang tambal didto sa mga hospital sa Europe ug North America tungod sa daghang balatian nga nasinati lakip na ang gitawag og “tripledemic” nga mao ang COVID-19, Flu ug Bronchitis. Mora’g makuli kini nga masinati sa Pilipinas tungod kay, bisan ni’ng kabag-ohan, uso pa man gihapon ang “tambal-binisaya” ug “tayhop-tayhop.” Daghan pa ang mga albularyo dinhi sa ato nga maantigo “moabog” sa dautang espiritu ug barato ra ang suhol sa serbisyo kay mosugot ra man gani’g pakyawon ang bayad sa ilang pagpanambal. Tawas tapol pa more!
Wala ma-“high blood”
Gikataho nga ni’ng nagsingabot nga kapaskohan, misaka usab ang presyo sa lechon sa nagkalain-laing parte sa nasud. Mokabat sa usa ka libo ka pesos ang average ang usbaw sa presyo sa lechon karon kon itandi sa presyo sa miaging tuig. Dayag nga kusog ang demand sa lechon. Hayan mosaka usab ang insidente sa “high blood” nga masinati niadtong naghambin sa maong balatian. Apan matud pa sa akong amigo, “Dili angayan mahadlok nga ma-high blood. Wala man gani ma-“high blood” ang baboy nga atong gikaon.” Madahaan!