Walay overtime pay

Dear Atty. Divine,

Usa ko ka gwardiya ug nagtrabaho ko sa usa ka security agency sud na sa duha ka tuig.

Duna koy pangutana labot sa akong sweldo nga way overtime pay.

Napulo ka oras ang akong duty matag adlaw apan ang akong madawat nga sweldo minimum ra man, buot ipasabot nga wa ko bayri sa akong duha ka oras nga overtime sa pagtrabaho matag adlaw.

Naa koy SSS, PhilHealth ug Pagibig apan wa koy 13th month pay ug bonus matag Pasko. Unsay angayan nako nga buhaton? Daghang salamat.

— Ramon

* * *

Dear Ramon,

Basi sa Labor Code of the Philippines, walo ka oras lang dapat ang usa ka empliyado nga motrabaho sa usa ka adlaw ug kun mosobra gani sa walo ka oras dapat mobayad na og overtime pay ang kompaniya. Kini gawas lang sa mga trabaho nga anaa sa field ang empliyado nga diin lisud sa pagmonitor sa management ang oras sa pagtrabaho sa employee.

Apan sa imo nga kaso , isip usa ka gwardiya dapat walo ka oras ra ka obligado nga motrabaho ug kun patrabahuon ka more than 8 hours dapat mobayad na og  ang agency nimo sa imong duha ka oras nga overtime.

Kalabot sab sa imong 13th month pay, obligado sab ang agency nga mobayad kanimo niana tungod kay mandatory kini basi sa atong balaod.

Samtang kanang Christmas bonus hinuon discretion na sa employer, so, dili ka makapamugos sa imong agency sa pagpangayo og bonus.

Ang maayo nimong buhaton labot sa imong problema sa overtime pay ug 13th month pay, mopadala ka og reklamo ngadto sa DOLE aron ilang ipatawag ang imong agency tungod sa wa nila pagtuman sa balaod. Thank you and God bless.

Atty. Divine

* * *

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.