Hagbay ra kong gisultian sa akong misis nga hinay na kuno kong molakaw gikan sa akong gilingkoran atubangan sa altar paingon ngadto sa ambo panahon sa Liturhiya, diin basahon ko na ang mga pulong sa Ginoo nga sinulat sa mga propeta, Santos ug Iyang mga pinili.
Usahay, magsapid kuno akong dila ug maugom ang mga pulong nga gibasa nako atubangan sa katawhan.
Sa sinugdanan, wala ko motuo. Apan dihang nakita ko ang video footage sa Disyembre 12, 2022, Piyesta sa Archdiocesan Shrine of our Lady of Guadalupe de Cebu, diin, si His Excellency Most Reverend Jose S. Palma, D.D. Archbishop of Cebu, ang nangulo sa gipahigayong Pontifical Mass sa ika alas 10:00 sa buntag ug ako ang usa sa mga lector, nakurat ko sa nadiskobrehan nako mismo sa akong kaugalingon.
Puno ra ba ang simbahan sa Guadalupe sa mga nanimbahay.
Mga dagkong tawo sa gobiyerno didto: Cebu City Mayor Mike Rama, former Cebu City Councilor Margot Osmeña ug uban pa.
Pastilan, nalum-it akong agtang pagkakita sa akong kaugalingon samtang nagbasa sa mga mass intention.
Haskang laina sa akong binasahan. Mora’g adunay traffic signs nga nakalangay sa akong pagbasa.
Labi na pag-abot sa mga nagpamisa nga ang agi sa ilang sinulat lisod kaayo basahon.
Nakapangutana ko sa hilom: “Ingon na niini diay ako karon kahinay?”
Unya, nasaksihan sab nako akong paglakaw padulong sa ambo alang sa Ikaduhang Pagbasa. Sa aktuwal, nagtuo kong paspas akong linaktan.
Pero sa video, mihinay man akong mga lakang. Lahi na, niadtong bus-ok-himsog pa akong panglawas ug wala pay oban akong buhok.
Sa mall ug mga opisina, daghan nang hamtong mosangpit nakog ‘Tatay.’ Sa balay, mga bata magkadungag sulti: “I love you. Good night, Lolo. Sa barangay hall, kon may senior citizen financial assistance nga ipanghatag, apil na ko sa molinya.
Kini nagmatuod. Nga kining inyong Tatay Javy sa ‘JAV, BANATI column’ ning mahal tang The Freeman Banat News, tigulang na gayod. Ang nakaparat kay wala makapangandam.
Wala gyod maminaw sa akong kauban sa trabaho kanhi, kinsa sige’g ingon: “Save something, Bay, for the rainy days.” Resulta?
Sa among pagretiro tungod sa pandemiya, ako pobre gihapon. Samtang siya, puwerte nang datoa.