Masulbad man lagi

Sulbad na ang problema sa posibleng grabeng trapik nga mamugna sa pagahimoon nga paglubong unta og dagkong tubo sa tubig sa MCWD diha dapit sa JY Square sa Lahug.

Atol sa tigum namo ni MCWD General Manager Edgar Donoso ug sa mga department head sa water district kagahapon sa buntag, nasabotan nga itipas ang paglubong sa mga tubo.

Nakigtigum ko ni GM Donoso kay sakop man ko sa Cebu City Traffic Management Coordination Board nga nagtan-aw nga malikayan ang problema sa trapiko.

Gitan-aw man gud namo sa CCTO Board nga kon ang paglubong sa tubo sa tubig anha moagi lagbas sa eskina Salinas Drive paingon sa Gorordo Avenue sa Lahug, mo-trapik gyud.

Gikauyonan namo nga imbes ang mga tubo sa tubig adto ikonektar sa mainline sa MCWD duol sa JY Square, adto na lang kini ikonektar sa laing linya sa may Fulton Street, Lahug.

Sa ingon nga paagi, dili na kaayo makamugna og trapik kay ang maong mubo nga karsada dapit sa Fulton Street wa man kaayo’y mangagi nga sakyanan, busa pwede ra gani sirad-an usa.

Apan mentras duna pa may himoon nga “fittings” ang contractor sa MCWD para sa mga dagkong tubo sa tubig, dili usa sila magkutkot sa karsada ug huwaton nila nga anaa na ang igsusumpay sa tinakdoan.

* * *

Karon kay dili pa man maglungag sa karsada ang contractor sa MCWD nga mao ang JFAP Construction, ang ilang paspasan og trabaho mao ang pag-ayo sa gipangguba nila nga bahin sa karsada nga ilang gilubngan og mga tubo sa      tubig.

Gikan sa “Lobregat property” sa Barangay Busay paingon sa Lahug Market, daghan pa nga mga bahin sa karsada nga wa pa maayo sa JFAP, ug nakamugna pa gihapon og kahuot sa mga sakyanan.

Nasawayan gyud ang engineer sa JFAP sa chairman sa Cebu City Traffic Management Board kay wa man sila makatuman sa ilang gisaad kaniadtong Nobiyembre 16, 2022 nga dalion nila ang pag-restore sa gipangguba nila nga karsada.

Maluoy man unta kita sa project engineer sa JFAP nga giayo og sukit-sukit ni Traffic Board Chairman Koko Holganza, apan unsaon nga wa man sila motuman sa ilang mga gisaad.

Kapin sa tubig na ang ilang proyekto nga gisukdan kaniadto pa nga Nobiyembre 16, 2021 ug napupos na gani ang tagal kaniadtong Nobiyembre 13, 2022.

Unta, makat-on na ang kadagkoan sa JFAP Construction nga kon makakuha gani sila og project, paspasan dayon nila’g trabaho aron madali pagkahuman, apan unsaon nga ang mga trabahador maihap lang gani sa mga tudlo.