Duna karoy mga memes nga nanggawas sa social media nga ang tuyo mao ang pagpakatawa sa mga netizens nga makakita. Kini mao ang sibuyas bombay nga gibahin og kapito ug ang matag hiwa dunay nakasuwat nga mga adlaw.
Ang gipasabot niini nga usa ka hiwa gamiton para anang adlawa sa pagluto sa sud-an. Unya kay katulo man magluto kada adlaw, sa ato pa bahinon pa gyud katulo ang usa ka hiwa.
Samtang gigitik niini ang imahinasyon sa mga netizens nga makabasa, makahatag kini og ideya sa publiko nga duna gyuy krisis karon sa sibuyas bombay. Ang sibuyas bombay usa sa batakang lamas para sa pagluto sa kusina sa mga Pilipino.
Duna gyuy krisis karon kay pwerte nang mahala sa matag kilo niini, gikan sa P300 ngadto sa P350. Dunay barato-barato apan lata-lata ug nikuyos na, puti man o pulang sibuyas. Mao nga dili na ikahibulong nga ang paborito natong kan-anan nga mga ‘pungko-pungko’ sa kilid-kilid dili na mohatag og libreng sibuyas bombay para sa saw-sawan.
Kun duna man, pabayran na kay lagi pwerte na kamahal karon kay ang pungko-pungko dili kompleto kun wala niining bombay, sili ug suka nga sawsawan.
Subo lang sab kaayo kay ang mga kadagkoan sa Department of Agriculture mismo miangkon wala silay ideya kun nganong nisaka ang presyo karon sa bombay.
Wala pa sila mahibawo kun nagkuwang ba ang supply niini o duna lang gyuy nagpaburot sa presyo niini. Apan nasayod sila nga karong sunod buwan, dunay mga maguuma nga mo-harvest og bombay.
Taliabot na ang Pasko, wala ba kaha nag-hoarding na sab ang mga hakog nga mga negosyante aron nga ini og duol na ang kasaulogan ayha pa ipagawas. Ug kining giingong gipaabot nga harvest mao ra gihapon kining mga gipangtagoang mga sibuyas bombay?
Kay kani ra bang mga tawo, bisan mahal apan kay gikinahanglanon kaayo ilabi na kun dunay okasyon dili naman lang sab moreklamo. Aning paagiha makasapi gyud og dako ang mga hangol sa kwarta nga mga negosyante.