EDITORYAL - Ang 13th month pay

Naghinam-hinam na ang mga mamumuo sa pagabot sa Pasko. Kini bisan pa og nangahulogan kini og daghang galastohanan aron bisan sa gamay nga paagi maselebrar kini kauban ang ilang mga minahal sa kinabuhi.

Apan gawas sa kapaskohan ug sa mga galastohan, usa sa gipaabot aning panahona ang 13th month pay ug para sa mga dagkong kompanya, aduna sab silay gitawag og Christmas bonus nga depende nalang sa ilang kompanya kun unsa kadako.

Subo lang nga dunay ubang mga kompanya nga dili gihapon maghatagan og 13th month pay sa ilang mga empleyado. Ang ilaha, Christmas bonus ra nga usahay ilang ingnon nga maoy 13th month pay.

Ang 13th month pay sumala pa sa The 13th Month Pay Law o Presidential Decree 851, obligadong mohatag ang mga pribadong kompanya niini ngadto sa ilang mga empleyado.

Ang 13th month pay bale og usa ka buwang sweldo sa empleyado o 1/12 sa total basic salary niini sa tibuok tuig.

Mahimo kining tungaon sa paghatag sa mga employers apan kinahanglang mahatag kini sa sud sa samang tuig apan dili molapas sa Disyembre 24 anang tuiga.

Bisan ang mga empleyadong gitaktak o mi-resign kinahanglan gihapong hatagan og 13th month pay sa dili pa matapos ang maong tuig sa ilang pagbiya sa trabaho, kini kwentahon sa 1/12 sa total basic salary nga nadawat niini anang tuiga.

Ang dili mohatag og 13th Month Pay mahimong pasakaan og kaso sa empleyado diha sa Department of Labor and Employment.

Dili ikalimod nga tungod sa kalisod sa panahon karon, daghan sa mga mamumuo ang nalubong sa utang.

Ang uban kanila prendado na ang ilang mga ATMs o sukli nalay kubrahunon gikan sa mga tigpatanto o tigpatanto.

Kaning 13th Month Pay, usahay paakan pa kini aning mga loan sharks nga dili gustong pabentaha.

Ang tumong niining 13th Month Pay para gyud sa kaayohan sa mga mamumuo, mura og pahalipay kanila sa ilang 12 ka buwang panerbisyo sa gitrabahoan nilang kompanya ug aron duna silay magamit ang mga mamumuo para sa pagselebrar sa Pasko kauban ang ilang pamilya.