EDITORYAL- Paghimong legal sa aborsiyon

Paghimong legal o opsyon sa aborsyon madawat na ba kaha sa mga Pilipino? Ang Pilipinas bisan unsa ka moderno ug daghan na ang liberal maghunahuna, nagpabilin kining konserbatibo tungod sa dakong impluwensiya sa simbahan sa matag pamilyang Pilipino.

Ning bag-ohay lang, UN Human Rights Committee nangusog sa pagawhag sa Pilipinas nga mopasar og mga reporma sa mga balaod niini nga mohaom sa mga international treaties nga gilagdaan sa nasud bahin sa sibil ug mga politikanhong katungod sa mga tawo.

Kaning sa politikanhong mga katungod, pirme na kining matuki tungod sa mga pagpanglutos sa gobiyerno sa mga kritiko niini. Ang solusyon naa ra tanan sa mga naa sa gahum kay sila ug ang ilang mga polisiya may direktang giigo o maapektahan.

Apan dili kini sama ka sensitibo kun ang hisgutan mao na ang mga civil rights sa matag usa ka Pilipino, sama sa aborsyon, diborsiyo ug anti-discrimination law.

Medyo bug-at kaayo kini nga hisgutanan tungod kay dili lang ang mga politiko ang gihisgutan niini kondili ang tanang mga Pilipino.

Ang aborsiyon sumala pa sa UN Human Rights Committee usa ka maayong opsyon para sa mga kababayen-an. Kini para sa ilang maayong panglawas ug luwas nga pagmabdos tungod kay daghan na ang mga namatay  tungod sa komplikasyon sa ilang pagmabdos.

Apan tungod dili man legal ang aborsyon dinhi sa nasud wala silay laing kapilian hangtud moabot gyud sa punto nga mabutang sa peligro ang ilang kinabuhi samtang padayong nagmabdos. Mao kini ang gustong ipasabot sa UNHRC.

Apan gawas niana, usa sab kini ka opsyon para sa mga biktima sa pagpanglugos, incest o panag-unay og hilawas sa managkabanay nga moresulta sa pagkamabdos apan base sa pagtuon kadaghanan sa gipakatawong resulta sa incest, dunay kakulian sa pangisip, masakiton, may deperensiya sa panglawas ug uban pa.

Ang tumong UNHRC mao nga dili kinahanglang pun-an pa ang kasakit sa mga biktima sa rape o incest pinaagi sa pagpadayon sa ilang gimabdos ug pagpakatawo sa bunga sa maong krimen.

Apan unsa may garantiya nga dili kini abusaron kun pananglit himuon ng legal ang aborsiyon? Ang Pilipinas gidominar sa Romano Katoliko kansang pagtulon-an nituhop na og maayo sa matag pamilyang Pilipino.