Dear Atty. Divine,
Duna koy pangutana labot sa kabilin sa akong iyaan nga namatay nga walay anak. Aduna ni siyay kabtangan nga gibilin, basakan, farm land ug house and lot. Kay wa man maminyo ang akong iyaan didto ko niya gipapuyo sa iyang balay ug ako isip pag-umangkon maoy nag-atiman kaniya hangtud nga siya namatay niadtong miaging tuig. Duha ra mi ka pag-umangkon niya ug ang usa tua magpuyo sa Mindanao. Sa wa pa namatay ang akong iyaan, iyang gitugon nako nga ang iyang house and lot iya gyung ihatag nako. Samtang ang farm land ug basakan magtunga daw mi sa iyang usa ka pag-umangkon kay duha ra man mi nga pag-umangkon niya nga iyang relatives kay ang iyang mga igsuon nangamatay na man sab. Ang akong pangutana, mamahimo ba nako nga maangkon ang house and lot basi sa tugon sa akong iyaan? Daghang salamat. — Norma
* * *
Dear Norma,
Basi sa atong Civil Code sa Article 804 to 809, kini naglatid sa mga lagda sa paghimo og Last Will and Testament ug kini nagkanayon nga ang tugon o Last Will and Testament kinahanglan gyud nga in writing, pirmado sa testator ug sa iyang tulo ka mga testigo ug kinahanglan nga notarized. Kun Holographic Will kinahanglan sab kini nga sinuwat sa kamot sa testator, pirmado niya ug adunay petsa. Sa kaso sa imong iyaan nga verbal lang ang iyang tugon dili kini balido ug dili kini nimo mapugos sa pagpatuman. Busa nahulog nga namatay ang imong iyaan nga way gibilin nga Last Will so kun duha nalang mo ka paryente ang nahibilin, kamong duha ang magbahin in equal share sa kabilin sa imong iyaan. Hinuon, mamahimo nimong suwayan sa paghangyo ang usa ka pag-umangkon sa imong iyaan kun mosugot ba siya nga ang house and lot maoy imong maangkon, kun mosugot siya then way problema apan kun mosupak siya, di gyud ka kapugos sa pagpatuman sa unsay imong gusto. Thank you and God Bless. — Atty. Divine
* * *
Alang sa inyong pangutana, palihug lang sa pag email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.