Husto kaayo ang pagahimoon sa Cebu Cordova Link-Expressway (CCLEX) nga magbutang sila og ramp aron nga kadtong mga sakyanan nga gikan dinhi sa downtown area sa Cebu City, sayon ra nga makaadto sa third bridge.
Lapad kaayo ang bukana sa Guadalupe River gikan diha sa Barangay Ermita paingon na sa Pahina San Nicolas ug mahimong anha nila tukora ang taytayan ibabaw sa sapa nga dili kaayo makahasol sa katawhan.
Aw, duna gyud hinuo’y mga balay nga maapektohan niining maong proyekto, ilabi na kadtong anaa gitukod sa tampi sa sapa kay duna may kampanya ang siyudad nga ibalik ang three-meter easement sa kasapaan.
Bitaw, kon ang tulay gud nga nagdugtong sa Cebu City paingon sa Cordova, adto ra agion sa South Road Properties (SRP) pwerteng hasola. Tiaw mo nga kon dia ka sa downtown area, moadto ka pa sa Mambaling?
Mao nga makaingon ko nga husto kaayo ang gihimo sa kadagkoan sa CCLEX, ug mao usab kini ang tinguha ni Mayor Michael Rama sukad pa kaniadto.
* * *
Karong adlawa, ang Metro Cebu Water District (MCWD), magpahigayon og public hearing diha sa sports complex sa Barangay Apas, Cebu City, ug giimbitar sa pagtambong ang mga opisyal sa 80 ka barangay sa siyudad.
Ang public hearing kabahin kini sa tinguha sa MCWD nga pausbawan ang prisyo sa ilang tubig sugod unya sa Hulyo 1, 2023. Ila sab nga ipahibawo nga karong Sabado, magsugod na ang MCWD pagdawat og mga application alang sa new water connections, ilabi na kadtong anaa sa mga upland areas sa Apas, Busay, Lahug.
Para kanako, makatarunganon na sab uy nga ang MCWD mopausbaw sa ilang prisyo sa tubig kay walo ka tuig na nga wa sila magpa-increase.
Gasto man gani ta og text-text nga dili kaayo importante ang uban, igo lang mo-text nga “K” unya i-send, aw peso na ang bayad. Unya tubig nga barato ra, magbagulbol? Kami diri sa bukid, nakasuway gani nga mipalit ko’g tubig nga tag P100 ang usa ka baril.
* * *
Magpasalamat ko ni Engr. Raul Lucero, ang presidente ug chief executive office (CEO) sa Visayan Electric kay pagpangayo nako’g tabang nga ma-corrected ang low voltage diri sa amo, aksyon dayon.
May gipangayoan ko’g tabang sa VECO, hinay kaayo uy, gi-refer na kuno sa engineering apan duha na lang ka buwan, way resulta. Sayonan ka, mo-trip off lang kalit ang akong aircon sa opisina ug announcer’s booth kay 160 volts ra ang kuryente?
Pagkontak nako ni Engr. Lucero, gipadad-an dayon ko og kawani nga misusi sa amo, dayon kagahapon, laing kawani ang mitan-aw na ug giingnan ko nga pun-an nila ang transformer.
Mabuhay ka sir!