Dear Atty. Divine,
Duna koy pangutana labot sa akong anak nga illegitimate. Ang amahan ining bataa usa ka foreigner ug sa dihang nabuntis ko wa na kini siya magpakita nako ug wa gani siya magsuporta sa bata sukad sa pagkatawo.
Karong bag-o kalit lang nga mitunga ang foreigner nako nga ex-boyfriend ug mi demand nga gusto siyang makakita sa bata. Ako siyang gitugotan nga makakita sa bata nga karon 3- years old na. Ako siya nga gisultian nga kinahanglan siyang mosuporta sa bata ilabi na kay wa koy trabaho ug nagsalig lang ko sa suporta sa akong bana nga usa sab ka foreigner.
Apan mi-demand sab siya nga hatagan siya og panahon nga makauban ang bata ilabi na kun ania siya sa Cebu. Apan plano nako karon nga dad-on ang bata sa gawas kay gi-petitionan man ako sa akong bana.
Ang akong pangutana mamahimo ba nako nga madala ang bata? Unsay angayan nako nga buhaton? Daghang salamat. — Nora
* * *
Dear Nora,
Ubos sa atong Family Code, kun ang bata illegitimate, ang inahan sa bata mao gyuy dunay katungod nga mo custody niini. Apan karon nga mitunga na ang amahan kinahanglan sab nga dili nimo siya hikawan sa iyang katungod nga makakita sa bata og dapat lang nga mo demand ka niya og suporta para sa bata. Apan ang katungod sa custody sa bata magpabilin gyud diha kanimo ug dili makapanghilabot ang amahan niini gawas lang kun aduna siya’y court order.
Samtang labot sa imong plano nga imong dad-on ang bata sa gawas, mamahimo nimo siyang dad-on og iapil sa petition sa imong bana apan posible sab nga pangayoan ka sa US Immigration ini’g process nimo sa papers og consent gikan sa amahan ug kun ugaling maglisud ka sa pagkuha og consent sa amahan sa bata, mamahimo ka nga modangop sa DSWD aron sa pagpangayo og Certification nga anaa sa imong Sole Custody ang bata ug mao kana ang imong i-submit ngadto kanila. Thank you and God Bless. — Atty. Divine
* * *
Alang sa inyong pangutana, palihug lang sa pag email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.