Tubig ipanghatag

Mas maayo pa nga ang mga driver sa tanker sa Metro Cebu Water District nga gitahasan paghatud og tubig sa kabalayan nga wa pay koneksyon sa tubig, anha lang sila mokuha sa koneksyon sa JE Hydro & Bio-Energy Corporation sa Busay.

Nahukman ni Engr. Jeffrey Hapitan, ang presidente sa JE Hydro & Bio-Energy Corporation, nga pagka karon manghatag sila og tubig sa katawhan, ug gusto nila nga ang mga delivery trucks anha mokuha nila’g tubig apan dili nila ibaligya ang tubig.

Matud ni Engr. Hapitan nga kinahanglang pakubsan sa mga nagdumala og delivery trucks ang ilang pangayoon nga bayad ngadto sa ilang hatdan og tubig, kay dili na man nila paliton ang tubig gikan sa JE Hydro.

Ang ilang pangayoon nga bayad, mao na lang ang paghatud. Sa ato pa, kon magpabayad ang mga private delivery trucks og P500 sa usa ka cubic nga tubig ((lima ka baril), bisan og magpabayad na lang sila og P250.

Gusto ni Engr. Hapitan nga mentras wa pa sila magsugod og suplay og tubig ngadto sa MCWD, mas maayo nga mangalipay ang mga tawo nga wa pay koneksyon sa tubig, ilabi na ang mga taga bukid.

Basi sa kontrata, ang JE Hydro mosuplay og labing menos 15,000 cubic meters nga tubig (75,000 ka baril) ngadto sa MCWD. Dugay ra nga nahuman ang ilang proyekto nga paghimo og dakong linaw didto sa Lusaran ug ibuga nila diha sa Busay.

Ang tubig ipasu’d sa duha ka dagkong water reservoir nga padayon pa nga gipahimo sa MCWD diha sa Busay.

Gikan sa Busay, ang MCWD mikontrata usab og laing kontraktor nga maoy mobutang og dakong tubo aron ang tubig moagas paingon sa JY Square og ipasu’d sa MCWD lines.

Apan ang nakadaot kay pwerte kalangay sa JFAP Construction sa paghuman sa ilang P115 Milyones nga pipe-laying project nga nakapahasol pag-ayo sa mga motorista.

Gani, kami sa Cebu City Traffic Board, nagplano nga moawhag nga ipa-blocklist sa MCWD ug sa Cebu City government kining mao nga kontraktor kon dunay umaabot nga mga proyekto.

Tingali, nahibulong kamo nganong kanunay ko nga naghisgot niining mao nga isyu. Una, anaa ko pirmi nga mag-agian sa karsada gikan sa JY paingon sa Busay ug apil ko nga nasakripisyo sa proyekto sa JFAP Construction.

Sayonan ka nga nagpatuga-tuga sila og su’d og kontrata ngadto sa MCWD, apan ila ra usab diay nga gipa-sub contract og laing contractor?

Makita nimo nga way paninguha ang JFAP Construction aron nga madali paghuman ang ilang proyekto, ug saksi niini ang mga motorista nga mag-agian diha sa Veterans Drive gikan sa JY paingon sa Busay.