EDITORYAL - Banyagang tradisyon

Modagsa sa mga sam-ang sugod karong adlawa ang mga tawo aron pagduaw sa ma minahal nila sa kinabuhi nga mitaliwan na sa laing kalibotan. Samtang ang uban mibalaan niini, duna say uban nga gihimo kining kalingawan nga hinuwaman gikan sa banyagang kultura.

Kini sama sa pagpahigayon og mga Halloween parties, Trick or Treat nga mga kalihokan nga gikan pa sa Amerika ug Uropa.

Tungod kay nakatampo man sab kini sa kasadya sa okasyon, daghang mga negosyo nga migamit niini aron sab makadani og mga customer sama sa mga gipanghimo sa mga malls.

Ang target mao ang mga kabataan nga lawom kaayo og imahinasyon ug sa samang higayon makapapugos sa ilang mga ginikanan aron mogasto para niini sama sa pagpalit og costumes ug uban pang may kalambigitan sa Kalag-Kalag.

Apan tungod kay naglambigit man kini og mga makahadlok nga nilalang nga giingong gikan sa dautan o sa yawa, wala mahimuot niini ang Simbahan.

Gani kaniadto dunay Obispo mihulagway niini nga iya sa yawa ug dili maayong himuong kalingawan sa mga kabataan.

May kamaturoan man o wala, lisud na kaayo kining papason pa sa hunahuna sa mga tawo ilabi na sa mga Pilipino kansang kultura ug tradisyon dili na matawag nga gikan tanan sa katiguwangan kondili hinulman na gikan sa mga banyagang kaniadto nanakop sa nasud.

Apan bisan paman niini, wala man sab mawala ang naandan sa mga Pilipino nga pagduaw sa mga minatay sa ilang pamilya panahon sa Kalag-Kalag.

Gani duna gyuy uban kaniadto nga gawas nga magpamisa, mag vigil pa gyud diha sa mga sam-ang. Karon gidili una kini sa gobiyerno tungod sa pandemiya ug sa kabalakang pagtumaw sa kasamok.

Bahala og giunsa pa nato pagsaulog kining maong okasyon, ang importante nga dili kalimtan ang mga mitaliwan na sa laing kalibotan.

Kay kun wala nay makahinumdom ug dili na maghisgot kanila sama ra og wala sila moagi ibabaw sa kalibutan kauban sa mga buhi.