Human ideklarar ni Presidente Bongbong Marcos nga usa ka special non-working holiday sa tibuok Pilipinas ang Oktubre 31 (Lunes), nga nahadikit sa magkasunod nga duha ka Adlaw sa mga Minatay, All Saints’ Day, Nobiyembre 1 (Martes) ug All Souls’ Day, Nobiyembre 2 (Miyerkoles) labihang lipaya sa mga mamumuo sanglit ikauban man nila sa hataas nga higayon ang ilang pamilya.
Happy days alang sa mga negosyante ang mga Adlaw sa Minatay. Mga mamaligyaay’g mga bulak? Mga tag-iya’g barko ug mga trak de pasaheroan? Sila tanan, pulos moganansiyag dako! Tiaw bay, gikan sa piyer ngadto sa bus terminals, magpanon ang mga pasahero nga mamauliay. Hayahaya sa bolsa sa mga negosyante, uy!
Apan subo palandungon. Ang mga lumargahay nga motabok og lawod, hugtanong gipugngan sa taga Cebu Ports Authority Station sanglit ang kinatibuk-ang lalawigan sa Sugbo gipaubos sa Signal No. 1 tungod sa bagyong ‘Paeng,” diin didto sa Maguindanao, Mindanao, nakatumpag nag mga bukid, nakapaanod nag gibahaang mga balay ug miangkon nag 31 ka kinabuhi nga naalaut sa iyang kapintas.
Matud pa sa Cebu Ports Authority, sa pagsulat niini, misugod na pagdagsa ang libolibong pasahero didto sa mga pantalan ug bus terminals ning atong siyudad. Moabot pa gyod kunog 300,000 ang gidaghanon sa sumasakay og barko sa mosunod nga mga adlaw.
Pero palargahon lang sila kon hingpit nang molurang ang hangin ug mokalma na ang mga dagkong balod nga gipabukal ni Paeng. Kaanugon sa 5-grandslam-day vacation nga gipangandaman sa mga mangunguliay. Nakuhaan nag usa ka adlaw ug makuhaan pag lain kon dili mohunong-mopalayo si Paeng.
May mensahe nga gipadala ang Ginoo sa bagyong Paeng. Mihangyo Siya nga ipiyong atong mga mata ug pangutan-on atong kaugalingon: “Unsa bay atong giapas sa pagsaulog sa mga Adlaw sa Patay? Kinasingkasing bang pag-ampo alang sa kaluwasan sa mga kalag nga atua pa sa Purifying Place o purgaturiyo? Or, aron lang mag-Halloween Party, makig-inom ug maglipaylipay uban sa atong pamilya ug kahigalaan? Nakatultol pa ba kitag simbahan niining mga adlawa?
Kini igo nang makatubag nganong gikibhangan sa Ginoo pinaagi ni Paeng ang kataas unta sa kahigayonan nga Iyang gihatag alang ning atong pagsaulog sa Kalagkalag-All Saints,’ All Souls’ Days niining tuiga.