Taliabot na sab ang taas-taas nga adlaw nga bakasyon para sa uban nunot sa deklarasyon og non-working holiday sa Oktubre 31 ug Nobiyembre 1, 2022 tungod sa All Saints Day. Siguradong mangungingi napud sa mga bisita ang nagkalain-laing mga resorts.
Taas-taas ni nga bakasyon tungod kay ang Oktubre 31,2022 adlaw nga Lunes. Gikan Oktubre 29 (Sabado) , Oktubre 30 (Domingo) wala man gyuy trabaho o klase sa mga tunghaan. Siguradong modagsa na usab ang mga tawo sa nagkalain-laing tourist destinations dinhi sa kabisay-an ilabi na sa Sugbu.
Nabatasan naman sa mga Pilipino karon nga modalikyat og laag kauban sa pamilya panahon nga dunay okasyon, sama niining kalag-kalag bisan og natunong kini sa Nobiyembre 2 nga tingtrabaho ug dunay klase. Ang uban, mag-una una na og duaw sa mga sam-ang Oktubre 29 aron bisitahon ug ikauban ang ilang mga minahal sa kinabuhi nga mitaliwan na sa laing kalibutan. Kini aron nga sa mosunod nga mga adlaw, magkauban silang mga nahibiling buhi sa paglingaw-lingaw.
Aning mga okasyona mosadya ang mga beach resorts, mountain resorts ug uban pa. Aning mga panahona sab mokita og dako ang mga manindahay aning mga lugara.
Usa kini ka pamaagi aron molagsik ug molambo balik ang turismo dinhi sa nasud human sa duha ka tuig nga pagkapiang tungod sa pandemiya sa Covid-19.
Apan aning mga panahona sab mogara ning mga mamentaha o mga mapahimuslanon sa panahon. Dunay mga vendors ilabi na mga pagkaon ug souvenirs ang magpaburot og maayo sa ilang presyo tungod kay daghan man ang bisita.
Ang resulta, duna gyuy mga negatibong mga posts sa social media nga manggawas batok aning mga suroyanan, dili maayo kay dili naman hinuon ganahan ang ubang nagplanong mosuroy kay lagi mahal kaayo ang palaliton.
Dili kini makatabang sa lokal nga turismo ug ang maapektahan kani gihapong mga vendors. Busa aron maprotektahan ang mga turista, ang negosyo , ug ang industriya mismo sa turismo gikinahanglang dunay regulasyon nga umolon ang mga lokal nga kagamhanan.
Dili na unta sila magpaabot pa nga dunay manggawas nga bati bahin sa ilang dapit diha sa social media. Ang tuyo sa mga turista mao ang paglingaw ug pagwagtang sa ilang stress ug dili pun-an og konsumisyon.