Pakloy nga kontraktor

Kaniadtong Sabado, ang kahuot sa mga sakyanan nasinati sa Gorordo Avenue gikan sa Lahug lahos na gyud sa kinatumyan, ug sa Escario Street sab paingon sa Capitol.

Mangutana mo og ngano? Dunay naabereya nga PUJ sa Sitio Maracas sa Lahug, paingon na sa Marco Polo Hotel. Ang mga sakyanan nga motungas unta paingon sa bukid, maglisud na pag-agi.

Ang uban nga dili suheto sa traffic, wa tingali masayod nga ang kahuot sa mga sakyanan diri sa Sitio Maracas, Lahug mosangpot usab og grabeng traffic sa Gorordo Avenue, Escario Street ug Salinas Drive.

Kay kadtong mopaingon sa bukid, dili na man makaagi dayon, hinay ang pagsibog sa mga sakyanan. Ang nakaingon niini mao kanang paglubong og mga dagkong water pipes sa MCWD.

Ipasabot nako nga nindot ang maong project sa MCWD kay magdugang man kini og suplay nga tubig, apan ang nakaapan kay ang gikuha nila nga kontraktor, pwerte ka ligoy.

Dugay ra nga nahuman ang paghimo’g water connection aron makakuha ta og tubig gikan sa Lusaran ug mahimo na nga paagason diha sa Busay.

Apan kay daghan man kaayo ang tubig, gikontrata sa MCWD ang JFAP Construction aron maoy mohimo sa “pipe laying” kon paglubong og dagkong tubo nga agian sa tubig gikan sa Busay paingon sa JY Square.

Ambot og gitugot ba usab sa MCWD nga ang proyekto, gipa-sub-contract sa JFAP ngadto sa laing contractor ug maoy grabe kahinay motrabaho.

Gihatagan na sila og 24-hours working permit sa Cebu City Council aron mopaspas ang pagtrabaho, apan mao ra gihapon nga mora’g mahadlok mosweldo og mga trabahador.

Tungod sa dako kaayong kahasol nga namugna niining maong kontraktor, nagplano na lang ang Cebu City Traffic Management Board nga irekomendar ngadto sa Department of Engineering and Public Works (DEPW) ug DPWH nga temporaryong ipahunong ang maong project.

Hinuon, gikontak nako si Atty. Joey Daluz III nga maoy chairman sa MCWD, ug gitug-an ang isyu. Matud ni Atty. Daluz nga mora’g dunay opisyal sa MCWD nga nagmika sab sa katungdanan.

Gisaaran ko ni Atty. Daluz nga ipatawag niya ang kontraktor sa JFAP, ug apil mi si Atty. Koko Holgansa nga maoy among chairman sa Traffic Board, aron kahisgotan kining kalangay sa mao nga proyekto.

Patambongon ko sa miting kay suheto ko nganong palpak ang kontraktor sa paghuman dayon sa ilang proyekto. Anaa ko mag-agian diha halos kaupat ka higayon sa usa ka adlaw, ug makita nako ang pakloy kaayo nga mga trabahador.