EDITORYAL - World Food Day

Niadtong Oktubre 16 gisaulog ang World Food Day sa tibuok kalibotan. Apan samtang kini giselebrar sa ubang mga nasud, dunay milyon-milyon ka tawo sa kalibotan ang gipanggutom o walay access sa maayong pagkaon aron makabaton og maayong panglawas.

Ang Pilipinas ubos sa administrasyon ni Presidente Ferdinand Marcos Jr. misaad nga palambuon niini ang agrikultura aron makapalit og sustansiyadong pagkaon bisan ang kinapobrehang Pilipino.

Atol sa kampanya sa nakalabay nga eleksyon, si Marcos misaad nga buhion ug palagsikon ang agrikultura sa Pilipinas sa tuyo nga dili magutom ang katawhan ug dunay paigong supply sa pagkaon ang mga Pilipino ug himuon niyang usa sa mga top food producer ang nasud.

Tuod man, siya karon maoy nagdala sa Department of Agriculture,  ang ahensiya sa gobiyerno nga maniguro sa seguridad sa pagkaon sa nasud.

Gawas sa agrikultura, apil sa tahas sa DA ang panagatan ug pangisdaan ingon man mga hayopan. Apan dunay daghang mga yangungo ang mga mag-uuma, mananagat, dunay mga pangisdaan  ug mga namuhi og mga hayopan nga wala pa gyud mahatag sa gobiyerno.

Ang maong sektor nagatubang og daghang problema pagpadayon sa ilang panginabuhian sama sa katalagman, presyo sa abuno, irigasyon, makinarya, mga dangan, hasta sab ang kalinaw sa ilang lugar, nakaapektar gyud sa ilang abot.

Kini maoy kinahanglang union pagsulbad sa gobiyerno. Dili pulos lang kutob pangandoy nga mahimong self-sustaining ug mahimong top food producing country ang Pilipinas kay kutob lang kini sa papel.

Kinahanglang dunay pisikal nga aksyon nga himuon aron kini mahitabo pinaagi sa seryusong pagbubo og  dakong pundo para masiguro ang food security sa nasud.

Sama sa makinarya aron mas paspas ang pagtanom, pag-ani, paghakot niini padung sa kamerkadohan ug daghan pang uban.

Tabangan ang maong sektor makabaton og puhonan, teknikal nga tambag gikan sa mga batid sa agrikultura ug pangisda ug pagsigurong dili sila biyaan sa panahon nga dunay katalagman ug kun dunay ekonomikanhong krisis.

Kun dunay krisis, dako kaayo unta og matabang ang maong sektor aron dili magrabehan ang katawhan, kini kun sakto sila og suporta aron mapabilin nilang abunda ang ani ug barato gihapon ang presyo sa pagkaon para sa mga Pilipino.