Anak ni secretary

Misibaw ang panawagan alang ni Justice Secretary Jesus Crispin Remulla nga moluwat sa katungdanan agi og delicadeza human masikop ang iyang anak nga si Juanito Jose Remulla III didto sa Las Piñas tungod sa paghupot og kapin sa usa ka milyon ka pisos nga kantidad sa imported marijuana.

Ang batan-ong Remulla napasakaan na og kaso didto sa Regional Trial Court sa Las Piñas niadtong Biyernes diin way gitugot nga piyansa. Ang kaso nga gisang-at mao ang paglapas sa Section 11 sa Republic Act 9165 o possession of illegal drugs.

Duna pa hinuoy laing kaso maylabot sa importation sa maong druga nga pending sa Pasay City Prosecutor’s Office.

Si Presidente Ferdinand Marcos Jr. namahayag nga way basihanan ang mga panawagan alang sa pagluwat ni Secretary Remulla. Sumala sa presidente nga pabilin siyang misalig sa integridad ni Remulla.

Si Secretary Remulla wala say plano nga mokanaog sa pwesto basi sa iyang pamahayag nga mag-agad siya sa hukom sa presidente.

Bisan ka pila pa mopasalig si Secretary Remulla nga di manghilabot sa kaso sa iyang anak apan di gyud malikayan ang mga pagduda.

Busa aron paglikay sa kontrobersiya ug pagprotehir sa integridad sa DOJ mas makatabang kun mokanaog siya sa pwesto ug dili magpahawid sa presidente.

Bisan pa og tinuod nga di siya manghilabot sa kaso, sa ngan nga siya maoy secretary sa DOJ dili gyud malikayan nga magpanuko ang iyang mga sakop nga madistino sa kaso batok sa iyang anak.

Kun ikaw maoy piskal nga maghupot sa kaso, makaako ka og papriso sa anak sa imong agawon?

Unsa may dangatan sa hustisya kun magpanuko ang prosecutor nga maghupot sa kaso? Ug unsay dag-anan sa hustisya kun ilang surambawon ang prosecution sa kaso aron maabswelto ang iyang anak?

Wala malilong sa publiko nga daghan sa mga durugista ang naabswelto sa mga kasong ilang giatubang bisan pa nagtipun-og nga mga ebidensiya tungod lang kay dunay mga teknikalidad nga wala mapasabot og maayo sa piskal ug sa iyang mga testigo.

Ang pagkalambigit sa iyang anak sa illegal nga drugas igo na kaayo nga rason aron siya mamutos sa iyang mga gamit ug mokanaug sa katungdanan. Wala magnihit og abogado ang Pilipinas nga mahimong mopuli sa iyang pwesto.

Gani mas daghan pa ang mas haum kay ni Secretary Remulla nga mohupot sa maong katungdanan. Kadtong mga abogado nga dugay na sa propesyon ug layo sa politika maoy angayang molingkod isip kalihim sa DOJ.