Makahimuot nga samtang hugot ng gipatuman sa Cebu City ang Oplan Disiplina niini, nagkaanam sab og kahapsay tan-awon ang kadalanan sa siyudad ug hinayhinay sab kining nakita bisan sa silingang mga dapit.
Dili lang ang talan-awon sa kahapsay kondili mabatyagan bisan sa mga tawong naglakaw-lakaw diha sa mga aseras nga hinayhinay nang nituhop ang disiplina sa mga tawo.
Hinuon dili pa gyud tanan hapsay kay duna may uban pang mga lugar nga duna pa gihapoy nagpasad nga basura o mga tawong magtabuk-tabok sa karsada bisan dunay karatulang “No Jay Walking” ug dunay mga manigarilyo gihapon.
Dili man sab kini madali, modagan pa kini og taas-taas nga panahon aron gyud hingpit nga magpuyo ang mga Sugbuanon nga disiplinado sama sa gitinguha ni Cebu City Mayor Michael Rama nga mahimong Singapore-like ang siyudad.
Gani gipahibalo sa Cebu City Environment and Natural Resources Office naka-kolekta na sila og P300 mil nga multa gikan sa mga tawong pataka og panigarilyo sa publikong lugar ug sa mga establisamentong nagkatag lang ang ilang basura o daghang basura sa ilang tungod apan wala gyud mohipos.
Kuwang lang gyud tingali ang mga enforcers sa mga ordinansa mao nga dili tanan mabantayan. Apan kinahanglan ba diay nga duna gyuy magbantay aron motuman ang mga tawo sa mga ordinansa?
Daghan mang mga barangay tanod nga pwedeng maoy mopatuman sa mga ordinansa diha mismo sa ilang mga hurisdiksyon, samtang ang mga sakop sa city hall maoy modumala sa mga dagkong mga dalan nga dili maato og bantay sa mga barangay.
Duna hinuoy positibong leksyon nga nakat-onan ang mga tawong dili residente sa Cebu City apan magkanunayan dinhi. Kini tungod kay ang disiplinang ilang nakat-onan matag duaw o duna silay tuyo sa Cebu City ilaha mang madala didto sa ilang mga lugar sa ilang pagpauli.
Basin pa diay, tungod sa gihimo sa Cebu City matakdan aning Oplan Disiplina ang tibuok Metro Cebu ug hangtud sa tibuok probinsya, makaayo kini para sa mga Sugbuanon ug sa mga dumuduong.