Dear Atty. Divine,
Duna koy napalit nga yuta nga amo nang gihinay-hinayan karon sa pagtukod og balay. Apan karong bag-o nakadawat mi og summon gikan sa barangay kay adunay mireklamo nga laing tawo kay sila daw ang tag-iya sa yuta nga amo karong gitukuran sa balay. Gi-schedule mi nga maghusay sa barangay sa sunod semana. Ang akong pangutana, unsa may among dad-on atul sa among paghusay sa barangay? Mamahimo ba diay nga ilang angkonon ang yuta nga kami man ang nagbayad niini sa tag-iya mismo ug aduna man gani kami Deed of Absolute Sale? Unsay angayan namo nga buhaton? Daghang salamat. — Renato
* * *
Dear Renato,
Atol sa husay sa Barangay mas maayo nga magdala ka og mga dokumento nga mopamatuod nga ikaw gyud ang tag-iya sa maong yuta sama sa Deed of Absolute Sale nga pirmado gyud sa tag-iya ug gi-notarized gyud sa abogado. Kun imo nang nabalhin ang Tax Declaration or Title sa imong pangan then mas maayo nga imo sab kining dad-on aron imong ipakita kanila ug ipamatuod nga ikaw ang tag-iya sa maong property. Apan kun pananglit wa pa nimo ma process ang pag-transfer sa Tax Dec o sa Title sa maong property ngadto sa imong pangan mas maayo nga imong sugdan ang pag-process sa pag-transfer niini pinaagi sa pag-adto sa BIR aron sa pagbayad og Capital Gains Tax og Documentary Stamp Tax . Adunay listahan ang BIR sa mga dokumento nga angayan nimong i-submit kanila alang sa pagbayad sa buhis aron imong ma-process ang pagbalhin sa maong property ngadto sa imong pangan. Kun di gyud mo mahusay sa barangay then modangop gyud ka sa korte. Thank you and God bless. — Atty. Divine
* * *
Alang sa inyong pangutana, palihug lang sa pag-email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.