EDITORYAL - Sulagma sa lotto?

Daghang ang nahibulong ug duna pa gani mikwestyon sa nigawas nga resulta sa nakalabay nga 5/55 PCSO lotto niadtong nakalabay nga Sabado, Oktubre 1,2022 kay 433 ka tawo ang nakadaog aron magbahin sa P236 milyones nga premyo.

Ang winning combination numbers sa maong draw mao ang 9, 18, 27, 36, 45 ug 54. Ang matag numero mahimo bahin ka-siyam o divisible by 9. Daghang ang nakapangutana kun giunsa man pagkahitabo nga kining 433 ka mga nakadaog nagkaparehas og napiling mga numero.

Wala man hinuon mapublikar kun kini ba tanang 433 pareho pagkahan-ay ang kombinasyon sa numero sa winning numbers. Hinuon sa PCSO, dili man kinahanglang “in order” ang mga numero, basta naa kini sa kombinasyon modaog kini.

Duna bay posibilidad nga mahitabo kini? Dunay posibilidad apan sulagma ra kaayo kun basihan ang mga napublikar nga mga susamang hitabo sa lottery sa tibuok kalibotan.

Sumala pa sa usa ka Associate Professor of Mathematical Science sa University of Technology Sydney, Stephen Woodcock sa iyang artikulo gikan sa The Conversation dili kini imposibleng dili mahitabo apan mas katuohan nga sikolohiya ug dili kalagmitan ang hinungdan nganong nahitabo kini.

Matud pa sa maong artikulo, sa 6/55 lottery ang usa ka tiket adunay 28,989,675 ka number combinations aron makadaog sa jackpot.

Mao nga makapahibulong nga 433 ang nakadaog, kun giunsa ni pagkahitaboa, posibleng natunong lang gyud nga pare-parehas og hunahuna ug gipiling numero ang mga nitaya anang adlawa.Kung dunay tikas nga nahitabo, maayong tan-awon kun dunay basihan, apan dili lang kini dinhi sa Pilipinas nahitabo sumala pa sa maong artikulo.

Niadtong 2018 didto sa United Kingdom duna say susamang hitabo ug sa tuig 2020 duna say susamang insidente didto sa South Africa diin daghan sab kaayo ang nakadaog sa jackpot.

Ang nakaayo niini, nahitabo kini karong panahona nga nagkalisod ang katawhang Pilipino tungod sa pagsaka tanan sa mga presyo sa palaliton.

Nagpasabot nga 433 ka pamilya ang matabangan sa maong premyo , dili man tuod makapa-milyonaryo nilang tanan, apan makabayad na sila sa ilang gikinahanglang bayran gamit ang ilang daog.