EDITORYAL - Guerilla-style e-sabong

Dugay ng gipahunong ang operasyon sa tanang online sabong o e-sabong, apan duna pa gihapoy mga kwartahan nga padayon sa pag-operate “guerilla-style” atubangan mismo sa mga otoridad.

Sa miaging semana, kalit nga gironda sa National Bureau of Investigation-Central Visayas ang usa ka sekretong cockpit o buwangan sa lungsod sa Minglanilla.

Apan sukwahi sa tradisyonal nga buwangan diin dunay daghang mga tawong manugal, ug dunay mga naninda ug banha kaayo sa masyada ang mga masyador ug sugarol, hilom kaayo ang maong buwangan.      

Mao diay nga walay kanaas madungog gikan sa gawas, ang mga sugarol nga mamusta anha lang ipaagi sa online. Susama sa operasyon sa legal nga e-sabong kaniadto nga gipahunong sa gobiyerno.

Bisan tuod kadto legal gipahunong kini ni kanhi presidente Rodrigo Duterte pila ka buwan sa wala pa siya hingpit mokanaog sa pwesto human ang DILG nihimo og pagtuon ug pakisusi sa epekto niini sa katilingban, nakita nga dili kini maayo.

Kabahin sa kultura sa mga Pilipino ang sugal, ilabi na ang sabong sa mga manok. Mao nga halinon kaayo kini sa mga tawo samot na kun di na kinahanglan pang moadto sa mga buwangan ang sugarol kay mahimo na kining buhaton bisan naa sa trabaho pinaagi lang sa cellphone.

Sama sa illegal swertres o numbers game, walay makolektang buhis ang gobiyerno gikan aning illegal nga mga e-sabong operation.

Ang otoridad sa paghatag og pagtugot ug lisensiya aning mga gambling operations mao lamang ang Philippine Amusement and Gaming Corporation (PAGCOR), apan tungod kay gipahunong naman sa gobiyerno ang e-sabong, wala na gyud untay operasyon niini.

Dako nga hagit sa mga otoridad ang pagpahunong niini tungod kay daghan pa gihapong mga Pilipino ang matintal aning sugal, samot na kun kini sayon nalang buhaton sama sa pagpusta gamit ilang mga cellphones.