EDITORYAL - Anibersaryo sa Martial Law

Karong adlawa ang sumad sa ika-50 ka anibersaryo sa Martial Law pinasikad sa Proclamation No. 1081 ni kanhi presidente Ferdinand Marcos niadtong Septiyembre 21,1972. Siya ang amahan sa kasamtangang pangulo sa nasud nga si Presidente Ferdinand “Bongbong” Marcos Jr.

Ang deklarasyon sa martial law nag-ugat sa matud pa hulga sa seguridad sa nasud tungod sa nagkakusog nga rebelyon didto sa Mindanao ug insurhensiya mugna sa mga komunistang New Peoples Army ingon man mga kriminalidad sa bisan asang suok sa nasud.

Mao nay linya kaniadto sa gobiyerno. Pinaagi sab niini, tanang gahum sa mga sibilyang otoridad ug militar gibalhin ngadto kang Marcos nga epektibong nakapatawag kaniyang diktador.

Ang oposisyon kaniadto hugtanong misaway sa katarungan ni Marcos tungod kay matud pa paagi niya kini aron pahilumon ang iyang mga kritiko ug mga kaaway sa politika aron magpabilin kini sa gahum.

Unang nabiktima ug gilutos ang media o mga tigbalita, gawas lang niadtong mga estasyonan og mga pamantalaang trompa sa administrasyon.

Angay mahibaw-an sa tanan nga dili lang ang media ang gipahilom atong panahona kondili hasta ang mga ordinaryong Pilipino nga gustong moreklamo batok sa pagpangabuso sa mga naa sa gobiyerno.

Tinuod daghang nahimo si Marcos sa dihang siya pay presidente, apan natabunan kini sa mga dili maayong mga panghitabo sa dihang mideklarar siya og martial law ug nalugwayan ang iyang termino og 14 ka tuig.

Ang kasamtangang presidente karon mihimakak nga usa ka diktador ang iyang amahan kay gihimo lamang niini ang sa iyang tan-aw makasalbar sa nasud gikan sa mga gustong mobungkag niini.

Posibleng may kamatuoran kini, apan lahi man ang binuhatan o mga nahitabo diha sa ubos sa mga kamot sa militar ug sa konstabularyo o Philippine Constabulary.

Daghan sa populasyon karon ang wala makaabot o wala pa ipanganak, kun napanganak man, wala pay nasabtan sa mga panghitabo sa nasud ilabi na sa kainit sa politika kaniadto.

Samtang dili maayong balik-balikon ang maong bati nga bahin sa kasaysayan sa Pilipinas, maayong ipabilin kini sa mga kasingkasing  ug alimpatakan isip pagtulon-an .

Ang tumong niini, aron sila mahimong magbinantayon kanunay sa ilang panahon aron dili nila maagian ang kaagi sa uban kaniadto.